​પુણે: મહારાષ્ટ્રના પુણેમાં આવેલા ઐતિહાસિક લોહગઢ કિલ્લા પરથી નીચે ધકેલીને બિઝનેસમેન અને પ્રોફેશનલ ટ્રેકર કેતન અગ્રવાલની કરવામાં આવેલી ક્રૂર હત્યાના મામલામાં દરરોજ ચોંકાવનારા અને રૂવાડા ઊભા કરી દે તેવા રહસ્યો સામે આવી રહ્યા છે. પોલીસ કસ્ટડીમાં રહેલી કેતનની હત્યારી મંગેતર સિયા ગોયલે પૂછપરછ દરમિયાન વધુ એક નવો વળાંક આપતો દાવો કર્યો છે. સિયાએ પોલીસ સમક્ષ કબૂલાત કરી છે કે કેતન પોતાના માથા પર વાળની નાની વિગ (હેર પેચ) લગાવતો હતો, જે તેને જરાય ગમતું નહોતું અને તેના કારણે તે કેતન સાથે લગ્ન કરવા ઈચ્છતી નહોતી. જોકે, પરિવારના દબાણ અને સગાઈ તોડવાથી સમાજમાં થનારી બદનામી કે સામાજિક કલંકના ડરથી તેણે સંબંધનો અંત લાવવાને બદલે કેતનને જ હંમેશા માટે રસ્તામાંથી હટાવી દેવાનો ભયાનક નિર્ણય કરી લીધો હતો.

​બીજી તરફ, મૃતક કેતનના પિતા દેવીચંદ અગ્રવાલે આ બાબતે સ્પષ્ટતા કરતા જણાવ્યું છે કે, કેતનના દેખાવ અને તે હેર પેચ વાપરતો હોવાની બાબત સિયાના પરિવારથી ક્યારેય છુપાવવામાં આવી નહોતી. સગાઈ પહેલા જ આ અંગે બન્ને પરિવારો વચ્ચે સ્પષ્ટ વાત થઈ ચૂકી હતી. તેમણે રોષે ભરાતા સવાલ કર્યો હતો કે શું કોઈ વ્યક્તિ વિગ પહેરે છે તે કોઈની હત્યા કરવાનું કારણ હોઈ શકે? કેતનના પિતાએ મુખ્યમંત્રી સમક્ષ આ કેસ ફાસ્ટ ટ્રેક કોર્ટમાં ચલાવીને આરોપીઓને ફાંસીની સજા આપવાની માંગ કરી છે, જેના પર સરકારે આ કેસ માટે એસઆઈટી (SIT) ની રચના પણ કરી દીધી છે.

​પોલીસના સત્તાવાર સૂત્રો પાસેથી મળતી માહિતી મુજબ, ૨૦ વર્ષીય સિયા ગોયલ અને તેના ૨૨ વર્ષીય કથિત પ્રેમી ચેતન બાબુલાલ ચૌધરી છેલ્લા છ મહિનાથી સતત એકબીજાના સંપર્કમાં હતા. આ ગાળા દરમિયાન બંને વચ્ચે ૨,૦૦૪ થી વધુ વખત ફોન પર વાતચીત થઈ હતી અને તેમણે આશરે ૨૩૮ કલાક જેટલો સમય ફોન કોલ્સ પર વિતાવ્યો હતો. કેતનની હત્યાના ગણતરીના કલાકો પહેલા પુણેના જ એક સીસીટીવી ફૂટેજ પણ પોલીસને હાથ લાગ્યા છે, જેમાં સિયા અને ચેતન એક સ્થાનિક કૅફેમાં સાથે બેસીને એકબીજાના હાથ પકડી અત્યંત ગંભીરતાથી આ સમગ્ર હત્યાકાંડની રૂપરેખા તૈયાર કરતા નજરે પડે છે.

​પોલીસ તપાસમાં એ વાત પણ સાબિત થઈ છે કે કેતનને મોતના મુખમાં ધકેલવા માટે સિયાએ એક-બે નહીં પરંતુ ત્રણ વખત યોજના બનાવી હતી. કેતન ટ્રેકિંગનો શોખીન હોવાથી સિયાએ જાણીજોઈને લોહગઢ કિલ્લાની પસંદગી કરી હતી જેથી હત્યાને અકસ્માતનું રૂપ આપી શકાય. ગત ૩૧ મેના રોજ બંનેએ પ્રથમવાર કિલ્લાની મુલાકાત લીધી હતી. ત્યારબાદ ૧૪ જૂનના રોજ પ્રથમ પ્રયાસ દરમિયાન અચાનક ત્યાં સાપ આવી જતાં પ્લાન નિષ્ફળ રહ્યો હતો. આ પૂર્વે ૬ જૂને સિયાએ પ્રી-વેડિંગ શૂટ માટે બાલી જવાની યોજના પણ કેતનનો પાસપોર્ટ કારમાંથી ચોરીને મહિલા વૉશરૂમમાં ફેંકી દઈને ફ્લોપ કરી નાખી હતી, કારણ કે તે કેતન સાથે જવા માંગતી નહોતી.

​અંતે ૧૮ જૂનના રોજ, પૂર્વયોજિત કાવતરાના ભાગરૂપે સિયાએ કિલ્લા પર કેતનને અંધારામાં રાખીને એક ખાસ સિગ્નલ આપ્યું હતું. સિયાએ નીચે બેસવાનો ડોળ કર્યો, જે ચેતન માટે ઈશારો હતો. ઈશારો મળતાની સાથે જ પાછળથી ધસી આવેલા ચેતન ચૌધરીએ કેતનને ઊંડી ખીણમાં ધક્કો મારી દીધો હતો. શરૂઆતમાં આ ઘટનાને જન્મદિવસની ઉજવણી દરમિયાન થયેલો સામાન્ય અકસ્માત ગણાવીને પોલીસને ગેરમાર્ગે દોરવાનો પૂરો પ્રયાસ કરાયો હતો, પરંતુ ઝીણવટભરી ટેકનિકલ તપાસ અને સિયાના સતત વ્યસ્ત રહેતા ફોન રેકોર્ડ્સના આધારે પોલીસે આખા ગુનાનો પર્દાફાશ કરી બંને હત્યારાઓને જેલના સળિયા પાછળ ધકેલી દીધા છે. સિયાના પોતાના પિતાએ પણ નિવેદન આપ્યું છે કે જો તેમની પુત્રી દોષી હોય તો તેને કાયદા મુજબ કડકમાં કડક સજા મળવી જોઈએ.