​નવી દિલ્હી : આગામી તહેવારોની સિઝન પૂર્વે જ સામાન્ય નાગરિકો અને ગૃહિણીઓ માટે માઠા સમાચાર સામે આવ્યા છે. વૈશ્વિક સ્તરે અનાજ અને ખાદ્યાન્ન વસ્તુઓની કિંમતોમાં અચાનક મોટો ઉછાળો નોંધાયો છે. આંતરરાષ્ટ્રીય બજારમાં ધાન્ય પાકોના ભાવ વર્ષ 2022 પછીના સૌથી ઊંચા સ્તરે પહોંચી જતાં આગામી દિવસોમાં સ્થાનિક બજારમાં પણ અનાજના ભાવ વધવાની પૂરેપૂરી શક્યતા વ્યક્ત કરાઈ રહી છે.

​વૈશ્વિક પરિબળોની સીધી અસર
​મળતી વિગતો મુજબ, આંતરરાષ્ટ્રીય સ્તરે હવામાનમાં આવેલા ફેરફારો, પાક ઉત્પાદનમાં ઘટાડો અને પુરવઠા શૃંખલા (સપ્લાય ચેઈન)માં સર્જાયેલી વિક્ષેપતાને કારણે વૈશ્વિક બજારમાં ઘઉં, ચોખા અને અન્ય કઠોળના ભાવમાં રોકેટ ગતિએ વધારો થયો છે. 2022 પછી પ્રથમ વખત અનાજના ભાવ આટલા ઊંચા સ્તરે જોવા મળ્યા છે.

​સામાન્ય વર્ગના ખિસ્સા પર પડશે સીધો બોજ
​સામાન્ય રીતે તહેવારોના દિવસોમાં ઘરગથ્થુ વપરાશ અને ખાદ્યપદાર્થોની માંગમાં ભારે વધારો થતો હોય છે. એવામાં જ અનાજના ભાવ આસમાને પહોંચતાં ચોખા, લોટ અને અન્ય રોજીંદી ખાધ્યસામગ્રી મોંઘી થવાના એંધાણ છે. આ ભાવવધારાને કારણે મધ્યમ અને ગરીબ વર્ગના મહિનાના રસોડાના બજેટ પર સીધો પ્રહાર પડશે, જેના કારણે લોકોમાં ચિંતાનું મોજું ફરી વળ્યું છે.