કોચી : મુખ્ય ચૂંટણી કમિશનર જ્ઞાનેશ કુમારની કામગીરી સામે સવાલો ઉઠાવતા કોકરોચ જનતા પાર્ટીના સંસ્થાપક અભિજીત દીપકે શનિવારે જણાવ્યું હતું કે દેશમાં સ્વતંત્ર અને નિષ્પક્ષ ચૂંટણી તંત્ર સુનિશ્ચિત ન થાય ત્યાં સુધી તેમની આ લડત સતત ચાલુ રહેશે.

પ્રાપ્ત વિગતો અનુસાર, કોચીના મરીન ડ્રાઈવ ખાતે મતદાર યાદીના ખાસ સઘન સુધારણા (એસઆઈઆર) અભિયાન અને મુખ્ય ચૂંટણી કમિશનર વિરુદ્ધ યોજાયેલી 'જંતર મંતર એટ કોચી' વિરોધ રેલીમાં ભાગ લેવા માટે કોચી ઇન્ટરનેશનલ એરપોર્ટ પર પહોંચેલા દીપકે આક્રમક નિવેદન આપ્યું હતું.

તેમણે આક્ષેપ કર્યો હતો કે હાલના ચૂંટણી કમિશનરના નેતૃત્વ હેઠળ યોજાતી ચૂંટણીઓ પર ભરોસો કરી શકાય તેમ નથી અને માત્ર કોઈ એક પક્ષને ફાયદો પહોંચાડવા માટે ચૂંટણી પ્રક્રિયામાં ગરબડ કરવામાં આવી રહી છે, જેના વિરોધમાં આ જનઆંદોલન શરૂ કરવામાં આવ્યું છે.

દેશભરમાંથી મતદારોના નામ કમી કરવાના મુદ્દે વાત કરતા તેમણે દાવો કર્યો હતો કે વિવિધ રાજ્યોમાં લાખો મતદારોના નામ મતદાર યાદીમાંથી હટાવી દેવામાં આવ્યા છે, જેને લઈને યુવાનો અને નાગરિકોમાં ભારે રોષ પ્રવર્તી રહ્યો છે અને આગામી દિવસોમાં આ વિરોધ વધુ ઉગ્ર બનશે.

અભિનેતા પ્રકાશ રાજના નિમંત્રણ પર આ વિરોધ પ્રદર્શનમાં જોડાયેલા આ નેતાએ ચૂંટણી પંચની નિષ્પક્ષતા સામે ગંભીર સવાલો ઉઠાવતા જણાવ્યું હતું કે ચૂંટણી તંત્રની પવિત્રતા જાળવી રાખવી એ લોકશાહી માટે અત્યંત આવશ્યક છે અને પક્ષપાતી વલણને ક્યારેય સાંખી લેવામાં આવશે નહીં.

આ રેલીમાં અંદાજે ૫૦૦ જેટલા સક્રિય કાર્યકરો અને યુવા સંગઠનોના પ્રતિનિધિઓ જોડાયા હતા, જેમણે હાથમાં રાષ્ટ્રધ્વજ લઈને ચૂંટણી પંચ અને વહીવટી તંત્રની નીતિઓ વિરુદ્ધ ઉગ્ર સૂત્રોચ્ચાર કરીને વિરોધ પ્રદર્શિત કર્યો હતો.