​દિરાદૂન: ઉત્તરાખંડના રાજકારણમાં એક વિશાળ રાજકીય ભૂકંપ સર્જાયો છે. રાજ્યના પૂર્વ મુખ્યમંત્રી અને કોંગ્રેસના જ્યેષ્ઠ નેતા હરીશ રાવતે પાર્ટીના તમામ પ્રમુખ પદો પરથી રાજીનામું આપીને સમગ્ર રાજકીય વર્તુળોને ચોંકાવી દીધા છે. હરીશ રાવતના અત્યંત અંગત ગણાતા પૂર્વ ઓએસડી (OSD) અને વર્તમાન અંગત સચિવ ચંદન સિંહ જીનાના ઠેકાણાઓ પર એન્ફોર્સમેન્ટ ડિરેક્ટોરેટ (ED) દ્વારા હાથ ધરાયેલા દરોડા અને કરોડો રૂપિયાની અનામી સંપત્તિ જપ્ત કરાયા બાદ આ મોટી કાર્યવાહી સામે આવી છે. રાવતે કોંગ્રેસ વર્કિંગ કમિટી (CWC)ના કાયમી આમંત્રિત સભ્યપદ તેમજ ઉત્તરાખંડ પ્રદેશ કોંગ્રેસ સમિતિની કારોબારીમાંથી પોતાનું રાજીનામું સોંપી દીધું છે.

​આ સમગ્ર વિવાદની શરૂઆત વર્ષ ૨૦૧૬ના 'ઉત્તરાખંડ સબઓર્ડિનેટ સર્વિસ સિલેક્શન કમિશન' (UKSSSC) દ્વારા આયોજિત ગ્રામ પંચાયત વિકાસ અધિકારી (VPDO) ભરતી કૌભાંડથી થઈ છે. તપાસ એજન્સી ઈડીએ આ કૌભાંડના તાર શોધીને પૂર્વ સીએમના અંગત મદદનીશ ચંદન સિંહ જીનાના રહેઠાણ સહિત અન્ય પૂર્વ અધિકારીઓના દરોડા પાડ્યા હતા. આ તપાસ દરમિયાન જીનાના ઘરેથી રૂ. ૩૨ લાખની રોકડ રકમ, ૨૦૦ ગ્રામથી વધુ વજન ધરાવતા સોનાના ૧૩ સિક્કા, ૭ સોનાની ચેન અને રોલેક્સ, રાડો તથા પિયાજે જેવી વૈભવી બ્રાન્ડની ૧૨ મોંઘીદાટ ઘડિયાળો મળી આવી હતી. ઉપરાંત, ઈડી દ્વારા જીના અને તેમના પરિવારજનોના બેંક ખાતાઓમાં રહેલા રૂ. ૫૨.૧૬ લાખથી વધુના ફંડને પણ ફ્રીઝ કરી દેવામાં આવ્યું છે. દરોડામાં કુલ રૂ. ૧.૨૮ કરોડની ગેરકાયદે સંપત્તિનો ખુલાસો થયો છે.

​બીજી તરફ, ઈડી દ્વારા કરવામાં આવેલી પૂછપરછ દરમિયાન ચંદન સિંહ જીનાએ દાવો કર્યો હતો કે મળી આવેલા રોકડ નાણાં પાર્ટી ફંડ અને વિવિધ લોકો પાસેથી મળેલું દાન છે, જ્યારે કિંમતી ઘડિયાળો અને સોનાના સિક્કા તેમને તહેવારો તથા જન્મદિવસે મિત્રો તરફથી ભેટ સ્વરૂપે મળ્યા હતા. જોકે, તપાસ એજન્સીના આધારે જીના પાસે આટલી મોટી સંપત્તિનો કોઈ કાયદેસરનો હિસાબ કે આવકનો સ્ત્રોત નથી.

​આ કૌભાંડમાં આક્ષેપ છે કે વર્ષ ૨૦૧૫-૧૬માં અધિકારીઓની મિલીભગતથી પસંદગીના ઉમેદવારોના ઓએમઆર (OMR) સીટ કમિશનની કસ્ટડીમાંથી બહાર લાવીને ગેરકાયદેસર રીતે ભરવામાં આવ્યા હતા અને તેના બદલામાં કરોડો રૂપિયાનું કામકાજ થયું હતું.

​દરોડાની આ કાર્યવાહી બાદ હરીશ રાવતે સોશિયલ મીડિયા પર પોતાની વ્યથા ઠાલવતા જણાવ્યું હતું કે, ચૂંટણી નજીક આવતા જ તેમના અને તેમની પાર્ટી વિરુદ્ધ નરેટિવ ઊભો કરવાનો પ્રયાસ કરવામાં આવી રહ્યો છે. રાવતે ઉમેર્યું કે ચૂંટણી નજીક હોવાથી તેઓ પોતાની કોઈ વ્યક્તિગત બાબત કે સહયોગી સામેની તપાસના લીધે પાર્ટીની ભ્રષ્ટાચાર વિરોધી લડાઈને નબળી પાડવા માગતા નથી. આથી તેમણે પાર્ટીના હિતમાં સ્વૈચ્છિક રીતે રાજીનામું આપવાનો નિર્ણય કર્યો છે.