નવી દિલ્હી, તા.30: કોંગ્રેસ સાંસદ પ્રિયંકા ગાંધી વાડ્રા દ્વારા IIT મદ્રાસના ડિરેક્ટર પ્રોફેસર વી. કામકોટી વિરુદ્ધ કરવામાં આવેલી વિવાદિત ટિપ્પણી બાદ દેશનું શિક્ષણ અને વૈજ્ઞાનિક જગત ભારે આક્રોશમાં છે. પ્રિયંકા ગાંધીએ પ્રોફેસર કામકોટીને 'ગૌમૂત્ર નિષ્ણાત' (Goumutra Expert) કહીને બોલાવ્યા બાદ દેશભરના 215 થી વધુ અગ્રણી શિક્ષણવિદો, વૈજ્ઞાનિકો અને પ્રોફેસરોએ તેમને એક સખત શબ્દોમાં ખુલ્લો પત્ર લખીને પોતાની નારાજગી વ્યક્ત કરી છે.
શિક્ષણવિદોએ પોતાના પત્રમાં લખ્યું છે કે, "મજાકમાં કે રાજકીય લાભ ખાતર કરવામાં આવેલી આવી ટિપ્પણીઓ દેશના પ્રખ્યાત વૈજ્ઞાનિકો અને સંશોધકોની શૈક્ષણિક ક્ષમતાઓ અને સમર્પણનંવ ઘોર અપમાન કરે છે." પત્રમાં ઉમેરવામાં આવ્યું છે કે રાજકીય મતભેદો કે ચર્ચાઓ હોઈ શકે છે, પરંતુ દેશની પ્રીમિયર ટેકનિકલ સંસ્થાઓના વડાઓ અને વિજ્ઞાનીઓ વિરુદ્ધ આવા સસ્તા કટાક્ષ કરવાથી ઉચ્ચ શિક્ષણ અને સંશોધન ક્ષેત્રે ખોટો સંદેશ જાય છે.
નોંધનીય છે કે પ્રોફેસર વી. કામકોટી દેશના ટોચના કોમ્પ્યુટર વૈજ્ઞાનિકોમાંથી એક છે અને તેમણે દેશના પહેલા સ્વદેશી માઇક્રોપ્રોસેસર ‘શક્તિ’ (Shakti) ની ડિઝાઇનમાં મહત્વની ભૂમિકા ભજવી છે. પ્રિયંકા ગાંધીની આ ટિપ્પણી બાદ સોશિયલ મીડિયા પર પણ મોટો વિવાદ ઊભો થયો છે, જ્યાં લોકો પ્રિયંકા ગાંધી પાસે માફીની માંગ કરી રહ્યા છે અને વૈજ્ઞાનિકોના સન્માનની જાળવણી કરવાની સલાહ આપી રહ્યા છે.