નવી દિલ્હી (ન્યૂઝફર્સ્ટ) : વડાપ્રધાન નરેન્દ્રભાઈ મોદી દ્વારા દેશનું વિદેશી હુંડિયામણ (ફોરેક્સ રિઝર્વ) બચાવવા અને બિનજરૂરી વિદેશી ખર્ચ ઘટાડવા માટે કરવામાં આવેલી નમ્ર અપીલની ઉદ્યોગ જગત પર વ્યાપક અસર જોવા મળી રહી છે. રિયલ એસ્ટેટ ડેવલપર્સના રાષ્ટ્રીય સંગઠન 'ક્રેડાઈ' (CREDAI) એ વડાપ્રધાનની આ હાકલને માન આપીને નેધરલેન્ડના એમ્સ્ટરડેમ ખાતે યોજાનારી તેની પ્રતિષ્ઠિત વાર્ષિક ઈવેન્ટ 'નેટકોન' (NATCON) ને રદ કરી દીધી છે. હવે આ ભવ્ય કાર્યક્રમ ભારતની ધરતી પર જ આયોજિત કરવામાં આવશે.

1000 સભ્યો વિદેશ જવાના હતા:

ક્રેડાઈ દ્વારા દર વર્ષે તેની ફ્લેગશિપ ગાળા ઈવેન્ટ 'નેટકોન' નું આયોજન વિદેશમાં કરવામાં આવતું હોય છે. વર્ષ 2026 માટે આ કાર્યક્રમ એમ્સ્ટરડેમમાં યોજવાનું આયોજન હતું, જેમાં ભારતભરમાંથી અંદાજે 1,000 થી વધુ દિગ્ગજ સભ્યો અને ડેવલપર્સ ભાગ લેવાના હતા. જોકે, વડાપ્રધાને તાજેતરમાં જ ઉદ્યોગપતિઓને વિદેશમાં થતા જંગી ખર્ચમાં કાપ મૂકીને ભારતને આર્થિક રીતે વધુ મજબૂત બનાવવાની વિનંતી કરી હતી, જેના પગલે ક્રેડાઈએ તાત્કાલિક અસરે તમામ વિદેશી આયોજનો સ્થગિત કરી દીધા છે.

એક જ નિર્ણયથી 100 કરોડની બચત:

આર્થિક નિષ્ણાતોના મતે, ક્રેડાઈના આ એક જ નિર્ણયથી ભારત સરકારના આશરે 100 કરોડ રૂપિયા જેટલું વિદેશી હુંડિયામણ દેશની બહાર જતું અટકશે. આ રકમ અત્યાર સુધી વિદેશમાં હોટલ બુકિંગ, મુસાફરી અને અન્ય સગવડો પાછળ ખર્ચાતી હતી, જે હવે ભારતના જ પ્રવાસન અને હોસ્પિટાલિટી ક્ષેત્રને પ્રોત્સાહન પૂરું પાડશે. વડાપ્રધાનના પ્રભાવને કારણે લેવાયેલા આ નિર્ણયથી 'મેક ઇન ઇન્ડિયા' અને 'વેડ ઇન ઇન્ડિયા' જેવા અભિયાનોને વધુ બળ મળ્યું છે.

અન્ય સંગઠનો માટે બનશે પ્રેરણારૂપ:

ક્રેડાઈના આ સાહસિક પગલા બાદ હવે એવી પ્રબળ શક્યતા સેવાઈ રહી છે કે દેશના અન્ય મોટા ઉદ્યોગ મંડળો અને સંગઠનો પણ પોતાના વિદેશી કાર્યક્રમો અને પ્રવાસો ભારત તરફ વાળશે. જો તમામ મોટા સંગઠનો આ પદ્ધતિ અપનાવે તો દેશની તિજોરીને હજારો કરોડ રૂપિયાનું નુકસાન થતું બચાવી શકાય તેમ છે. ક્રેડાઈ હવે ભારતમાં જ કોઈ મોટા સ્કેલ પર આ કાર્યક્રમ યોજવાની તડામાર તૈયારીઓ કરી રહ્યું છે, જેનાથી સ્થાનિક રોજગારીમાં પણ વધારો થશે.