હૈદરાબાદ: વિદ્યાર્થીઓના પરીક્ષા ગેરરીતિ અને પેપર લીક વિરોધી કોકરોચ જનતા પાર્ટી (CJP) ના પ્રદર્શનો દરમિયાન સોશિયલ મીડિયા પર વડાપ્રધાન નરેન્દ્રભાઈ મોદી વિશે વાંધાજનક અને મોર્ફ કરેલી સામગ્રી વાયરલ કરવા બદલ હૈદરાબાદ સાયબર ક્રાઈમ પોલીસે મોટી કાર્યવાહી કરી છે. પોલીસે કેટલાક ફેસબુક અને ઇન્સ્ટાગ્રામ એકાઉન્ટના સંચાલકો સહિત સોશિયલ મીડિયા પ્લેટફોર્મ મેટા (Meta) ના ઈન્ડિયા હેડ સામે પણ સહ-આરોપી તરીકે નામજોગ એફ.આઈ.આર. (FIR) દાખલ કરી છે.

પોલીસના જણાવ્યા અનુસાર, ભાજપના સમર્થકો અને કાર્યકરો દ્વારા કરવામાં આવેલી સત્તાવાર ફરિયાદોના આધારે આ કાનૂની કાર્યવાહી કરવામાં આવી છે. પ્રદર્શન દરમિયાન ફેસબુક અને ઇન્સ્ટાગ્રામ પર વડાપ્રધાનની છબીને નુકસાન પહોંચાડતી અને વાંધાજનક રીતે એડિટ કરેલી તસવીરો તથા સામગ્રી વ્યાપકપણે પ્રસારિત કરવામાં આવી હોવાનો આરોપ મૂકવામાં આવ્યો છે. આ મામલે ભારતીય ન્યાય સંહિતા (BNS) અને માહિતી તકનીક (IT) એક્ટની સંબંધિત કલમો હેઠળ ગુનો નોંધવામાં આવ્યો છે.

આ કેસ અંગે સાયબર ક્રાઈમ ક્ષેત્રના તપાસ અધિકારીએ જણાવ્યું હતું કે, "અમે નોંધાયેલા કેસો અને ફરિયાદીઓ દ્વારા રિપોર્ટ કરવામાં આવેલી વાંધાજનક લિંક્સ અંગે મેટા કંપનીને નોટિસ જારી કરી દીધી છે. આ ઉપરાંત વાંધાજનક સામગ્રી પોસ્ટ કરનારા મૂળ આરોપીઓની ઓળખ કરીને તેમની ધરપકડ કરવા માટેની જરૂરી વિગતો અને ડેટા એકત્રિત કરવાની તજવીજ હાથ ધરવામાં આવી રહી છે."

આ મામલે હૈદરાબાદ પોલીસ દ્વારા આગળની ઊંડાણપૂર્વકની તપાસ ચાલુ રાખવામાં આવી છે અને આગામી દિવસોમાં સોશિયલ મીડિયા એકાઉન્ટ ઓપરેટરો સામે વધુ કડક પગલાં લેવાય તેવી પૂરેપૂરી શક્યતા છે.