ચેન્નાઈ : દેશના વડાપ્રધાન નરેન્દ્ર મોદી આવતીકાલે દક્ષિણ ભારતના પ્રવાસે ચેન્નાઈની મુલાકાત લેવાના છે. આ મહત્વપૂર્ણ મુલાકાત દરમિયાન તેઓ તમિલનાડુને અંદાજે ₹૧૩,૦૦૦ કરોડથી વધુના જંગી વિકાસ પ્રોજેક્ટ્સની ભેટ આપશે. આ પ્રસંગે તેઓ અનેક પરિયોજનાઓનું લોકાર્પણ અને શિલાન્યાસ કરીને રાજ્યના માળખાકીય વિકાસને વધુ વેગ આપશે.

આ પ્રવાસ દરમિયાન વડાપ્રધાન અંદાજે ₹૪,૯૦૦ કરોડના ખર્ચે નિર્મિત ચેન્નાઈ મેટ્રો રેલ પ્રોજેક્ટના બીજા તબક્કા (Phase 2) અંતર્ગત મેટ્રો સેવાનો પ્રારંભ કરાવશે. પૂનમલ્લી-પોરુર કોરિડોરમાં ૩.૭ કિમી લાંબું અનોખું ડબલ-ડેકર માળખું બનાવવામાં આવ્યું છે, જેમાં અત્યાધુનિક સિગ્નલિંગ સિસ્ટમ સાથે ડ્રાઈવરલેસ ટ્રેન સંચાલનને સમર્થન આપવામાં આવશે. આ ઉપરાંત, તેઓ ₹૭૫૦ કરોડથી વધુના રેલવે ઈન્ફ્રાસ્ટ્રક્ચર પ્રોજેક્ટ્સ દેશને સમર્પિત કરશે, જેમાં 'અમૃત ભારત સ્ટેશન યોજના' હેઠળ પુનર્વિકસિત કરાયેલા પાલાની, વેલ્લોર કેન્ટોનમેન્ટ, અંબાસમુદ્રમ, પરમાકુડી અને નમાક્કલ સ્ટેશનોનો સમાવેશ થાય છે.

વડાપ્રધાનશ્રી અંદાજે ₹૩,૭૦૦ કરોડના રાષ્ટ્રીય ધોરીમાર્ગ પ્રોજેક્ટ્સ તેમજ બંદર-સંબંધિત માળખાગત સુવિધાઓ અને કાર્ગો-હેન્ડલિંગ ક્ષમતા વધારવા માટેના વિવિધ વિકાસ કાર્યોનું ખાતમુહૂર્ત અને લોકાર્પણ કરશે. આ સાથે ચેન્નાઈ પેટ્રોલિયમ કોર્પોરેશન લિમિટેડની મનાલી રિફાઈનરી ખાતે અંદાજે ₹૧,૬૨૦ કરોડના ખર્ચે નિર્માણ પામનાર 'ગ્રુપ II/III લ્યુબ ઓઈલ બેઝ સ્ટોક્સ' પ્રોજેક્ટનો શિલાન્યાસ પણ કરાશે, જેનો ઉદ્દેશ્ય વાર્ષિક ૨૭૦ હજાર મેટ્રિક ટન પ્રીમિયમ લ્યુબ્રિકન્ટ્સનું ઉત્પાદન કરવાનો છે.

ટેકનોલોજી અને શિક્ષણ ક્ષેત્રે મહત્વનું પગલું ભરતા વડાપ્રધાન મોદી IIT મદ્રાસ ખાતે 'સુધા ગોપાલકૃષ્ણન બ્રેઈન સેન્ટર' રાષ્ટ્રને અર્પણ કરશે. તેઓ ગર્ભસ્થ અવસ્થાથી લઈને વૃદ્ધાવસ્થા સુધીના માનવ જીવનકાળ દરમિયાન ૧૦૦ થી વધુ માનવ મગજને ૩ડી (3D) એટલાસમાં મેપ કરવાના વૈશ્વિક વૈજ્ઞાનિક મિશનનો પણ શુભારંભ કરાવશે. આ ઉપરાંત તેઓ ચેન્નાઈમાં જયગોપાલ ગરોડિયા હિન્દુ વિદ્યાલય મેટ્રિક્યુલેશન ઉચ્ચ માધ્યમિક શાળાના સુવર્ણ જયંતિ મહોત્સવમાં પણ ઉપસ્થિત રહેશે.

વડાપ્રધાનના આ વિશિષ્ટ પ્રવાસને અનુલક્ષીને ચેન્નાઈ શહેરમાં ચુસ્ત પોલીસ બંદોબસ્ત અને સુરક્ષા વ્યવસ્થા સઘન કરી દેવામાં આવી છે. જાહેર જનતાની સુવિધા અને સુરક્ષાને ધ્યાનમાં રાખીને સવારે ૮ વાગ્યાથી સાંજે ૪:૩૦ વાગ્યા સુધી શહેરના વિવિધ મુખ્ય માર્ગો પર ટ્રાફિક ડાયવર્ઝન જારી કરવામાં આવ્યું છે.