બસ્તર : વડાપ્રધાન નરેન્દ્ર મોદીએ રવિવાર, ૮ નવેમ્બર ૨૦૨૬ ના રોજ છત્તીસગઢના બસ્તર જિલ્લાના કરનપુર સ્થિત કોબ્રા ઓપરેશન્સ બેઝ ખાતે સુરક્ષા જવાનો સાથે ઉત્સાહભેર દિવાળીની ઉજવણી કરી હતી. આ પ્રસંગને અત્યંત સીમાચિહ્નરૂપ ગણાવતા તેમણે જણાવ્યું હતું કે આ તે સમયની પ્રથમ દિવાળી છે જ્યારે દેશે નક્સલવાદ અને માઓવાદી ત્રાસ સામેની પોતાની દાયકાઓ જૂની લડાઈ જીતી લીધી છે. તેમણે ઉમેર્યું કે હવે દેશનો દરેક જિલ્લો ડરના સાયથી મુક્ત થઈને આ તહેવાર મનાવી રહ્યો છે.

વડાપ્રધાન નરેન્દ્ર મોદીએ સેન્ટ્રલ રિઝર્વ પોલીસ ફોર્સ એટલે કે સીઆરપીએફ, કોબ્રા અને રાજ્ય પોલીસના જવાનોના બલિદાન અને સમર્પણની મુક્તકંઠે પ્રશંસા કરી હતી. તેમણે કહ્યું કે સુરક્ષાકર્મીઓની અથાક મહેનતના પરિણામે જ બસ્તર જેવા અગાઉ માઓવાદના સૌથી મજબૂત ગઢ ગણાતા વિસ્તારોમાં આજે શાંતિ અને વિકાસનો સૂર્યોદય થયો છે.

જવાનોને પોતાના પરિવારના સભ્યો સમાન ગણાવતા વડાપ્રધાન નરેન્દ્ર મોદીએ વર્ષ ૨૦૧૪ માં પદ સંભાળ્યા પછીથી દર વર્ષે સૈનિકો અને સુરક્ષા જવાનો સાથે જ દિવાળી ઉજવવાની પોતાની પરંપરાને યથાવત રાખી હતી. આ તેમનો સુરક્ષા દળો સાથે દિવાળી ઉજવવાનો સતત ૧૩ મો વર્ષ હતો. બસ્તરના આ બેઝ પર તેમની મુલાકાત એટલા માટે પણ મહત્વપૂર્ણ હતી કારણ કે અહીં અગાઉ માઓવાદી પ્રવૃત્તિઓનું મોટું કેન્દ્ર હતું.

આ પ્રસંગે વડાપ્રધાન નરેન્દ્ર મોદીએ એક મોટી સિદ્ધિનો ઉલ્લેખ કરતા જણાવ્યું કે છેલ્લા ૪૭ વર્ષમાં આ પહેલું એવું વર્ષ છે જ્યારે ડ્યુટી દરમિયાન સીઆરપીએફનો એક પણ જવાન શહીદ થયો નથી. આ સુરક્ષા દળોની સચોટ રણનીતિ અને બલિદાનનું પરિણામ છે.

બસ્તર અને તેની આસપાસના અબુજમાડના જંગલો લાંબા સમય સુધી માઓવાદી હિંસાના કેન્દ્ર રહ્યા હતા. સરકારે માર્ચ ૨૦૨૬ ના અંત સુધીમાં દેશને નક્સલમુક્ત અને મે ૨૦૨૬ માં બસ્તરને સત્તાવાર રીતે નક્સલમુક્ત જાહેર કર્યું હતું. હવે આ વિસ્તારમાં રસ્તાઓનું નિર્માણ, કનેક્ટિવિટી અને બેંકિંગ સુવિધાઓ જેવા વિકાસ કાર્યોને વેગ આપવામાં આવી રહ્યો છે, જેથી પ્રદેશના લોકો મુખ્ય પ્રવાહમાં જોડાઈ શકે.