બાગપત, તા.૧૩: ઉત્તર પ્રદેશના બાગપત જિલ્લામાં દિવાળીના તહેવાર દરમિયાન ફટાકડા ફોડવા બાબતે થયેલા સામાન્ય વિવાદે ઉગ્ર સ્વરૂપ ધારણ કરતાં રાષ્ટ્રપતિના અંગરક્ષક (PBG) દળના ૨૬ વર્ષીય જવાન સૌરભ તોમરના માથામાં ગોળી વાગવાની ગંભીર ઘટના સામે આવી છે, જેમાં પોલીસે સઘન કાર્યવાહી કરીને બે મુખ્ય આરોપીઓની ધરપકડ કરી લીધી છે.

પ્રાપ્ત સત્તાવાર વિગતો અનુસાર, ગત ૮ નવેમ્બરના રોજ ગોપાલપુર ખદાના ગામમાં ફટાકડા ફોડવાની બાબતને લઈને સ્થાનિક રહેવાસીઓ ધીરજ અને મોનુ તથા પીડિત જવાનના પરિવાર વચ્ચે બોલાચાલી થઈ હતી, જે બાદમાં ઉગ્ર મારામારીમાં પરિવર્તિત થઈ ગઈ હતી.

આ તકરાર દરમિયાન આરોપી ધીરજ દ્વારા ચલાવવામાં આવેલી ગોળી દિવાલ સાથે અથડાઈને પરત ફરી હતી અને રજાઓ માણવા માટે ગામ આવેલા રાષ્ટ્રપતિના અંગરક્ષક જવાન સૌરભ તોમરના માથામાં વાગી હતી, જેના કારણે તેઓ ગંભીર રીતે ઘાયલ થઈ ગયા હતા.

આ હુમલા બાદથી ફરાર થયેલા અને ૧૦,૦૦૦ રૂપિયાના ઇનામી એવા બંને આરોપીઓ ધીરજ અને મોનુને પકડવા માટે પોલીસ અધિક્ષકના માર્ગદર્શન હેઠળ વિશેષ ટીમો બનાવવામાં આવી હતી, જેમણે શુક્રવારે એન્કાઉન્ટર દરમિયાન બંનેની ધરપકડ કરી લીધી છે.

પોલીસ સાથેની ઝડપ દરમિયાન જવાબી કાર્યવાહીમાં આરોપી ધીરજ ઈજાગ્રસ્ત થતા તેને સારવાર અર્થ હોસ્પિટલમાં ખસેડવામાં આવ્યો છે, જ્યારે તેમની પાસેથી ગેરકાયદેસર હથિયારો અને કારતૂસ પણ જપ્ત કરવામાં આવ્યા છે.

ઘટના બાદ તાત્કાલિક હોસ્પિટલ ખસેડાયેલા જવાન સૌરભ તોમરને મેરઠની સુભારતી મેડિકલ કોલેજમાં રિફર કરવામાં આવ્યા હતા, જ્યાં સફળ ઓપરેશન દ્વારા ડોક્ટરોએ તેમના માથામાંથી ગોળી બહાર કાઢી લીધી છે અને હાલ તેમની તબિયત સંપૂર્ણ સ્થિર હોવાનું જાણવા મળ્યું છે.