નવી દિલ્હી, તા. 03: ભારત અને અમેરિકા વચ્ચેના આર્થિક સંબંધોમાં એક નવો અધ્યાય શરૂ થવા જઈ રહ્યો છે. બંને દેશો વચ્ચે લાંબા સમયથી ચાલી રહેલા દ્વિપક્ષીય વેપાર કરાર (BTA) ની વાટાઘાટો હવે અંતિમ તબક્કામાં પહોંચી છે. ભારતમાં અમેરિકાના એમ્બેસેડર સર્જિયો ગોરે બુધવારે એક મહત્વપૂર્ણ નિવેદન આપતા જણાવ્યું હતું કે, આ વેપાર સોદો લગભગ ૯૯% પૂર્ણ થઈ ચૂક્યો છે અને માત્ર છેલ્લા ૧% મુદ્દાઓ પર કામ ચાલી રહ્યું છે.
બંને દેશો માટે 'વિન-વિન' પરિસ્થિતિ
સર્જિયો ગોરે આશાવાદ વ્યક્ત કરતા કહ્યું હતું કે, આ કરાર માત્ર ભારત કે માત્ર અમેરિકા માટે નહીં, પરંતુ બંને દેશોની અર્થવ્યવસ્થા માટે 'જીત-જીત' (Win-Win) ની સ્થિતિ ઉભી કરશે. કેન્દ્રીય વાણિજ્ય અને ઉદ્યોગ મંત્રી પિયુષ ગોયલે પણ અગાઉ આ જ પ્રકારનો વિશ્વાસ વ્યક્ત કર્યો હતો. તેમણે સ્પષ્ટ કર્યું હતું કે પ્રથમ તબક્કાનો આ સોદો ટૂંક સમયમાં સાકાર થશે, જે બાદ બીજા તબક્કાની ચર્ચાઓનો માર્ગ મોકળો થશે.
નિષ્ણાતો અને અધિકારીઓની કવાયત
આ કરારને આર્થિક સંબંધોને નવી ઊંચાઈ પર લઈ જવા માટે એક મહત્વનું પગલું માનવામાં આવી રહ્યું છે. હાલમાં બંને દેશોના વરિષ્ઠ અધિકારીઓ આ ડીલને આખરી ઓપ આપવામાં વ્યસ્ત છે. અમેરિકી પ્રતિનિધિમંડળનું નેતૃત્વ બ્રેન્ડન લિંચ કરી રહ્યા છે, જ્યારે ભારત તરફથી વાણિજ્ય વિભાગના અધિક સચિવ દર્પણ જૈન વાટાઘાટોનું સંચાલન કરી રહ્યા છે.
શું છે આગામી પ્લાન?
હાલમાં જે રાઉન્ડ ચાલી રહ્યો છે, તે મુખ્યત્વે કાનૂની અને તકનીકી વિગતો પર કેન્દ્રિત છે. ૪ જૂન સુધી આ વાટાઘાટો ચાલુ રહેશે, જેમાં બાકી રહેલા તમામ વણઉકેલાયેલા મુદ્દાઓનો ઉકેલ લાવવાનો પ્રયાસ કરવામાં આવશે. બંને દેશોના અધિકારીઓએ સોદાના વ્યાપક માળખા પર પહેલેથી જ સહમતી સાધી લીધી છે, તેથી હવે માત્ર ઔપચારિક જાહેરાતની રાહ જોવાઈ રહી છે.
આ વેપાર સોદો સફળતાપૂર્વક પૂર્ણ થવાથી બંને દેશો વચ્ચે માલ અને સેવાઓના આદાન-પ્રદાનમાં મોટો વધારો થશે અને વૈશ્વિક વેપારના નકશા પર ભારત-અમેરિકાની ભાગીદારી વધુ મજબૂત બનશે.