લખનૌ, તા.27: ઉત્તર પ્રદેશમાં આગામી વિધાનસભા ચૂંટણી પહેલા રાજકીય ગરમાવો ચરમસીમાએ પહોંચ્યો છે, જેમાં પક્ષપલટાના ખેલ વચ્ચે ભાજપના ભૂતપૂર્વ સાંસદ ધર્મેન્દ્ર કશ્યપ તેમની પુત્રી કીર્તિ કશ્યપ અને બસપા નેતા આબિદ અલી પોતાના સમર્થકો સાથે સમાજવાદી પાર્ટીમાં જોડાઈ ગયા છે. લખનૌ ખાતે સમાજવાદી પાર્ટીના રાષ્ટ્રીય અધ્યક્ષ અખિલેશ યાદવે તમામ નેતાઓને પક્ષનું સભ્યપદ ગ્રહણ કરાવ્યું હતું. આ રાજકીય ફેરબદલથી બરેલી અને આસપાસના વિસ્તારોમાં ભાજપ અને બસપાને મોટો રાજકીય ઝાટકો લાગ્યો છે.

રાજકીય પૃષ્ઠભૂમિની વાત કરીએ તો, બરેલીની આંવલા લોકસભા બેઠકના ભૂતપૂર્વ ભાજપ સાંસદ ધર્મેન્દ્ર કશ્યપની રાજકીય કારકિર્દી બસપાથી શરૂ થઈ હતી, જેના પછી તેઓ સપા અને ત્યારબાદ ભાજપમાં જોડાયા હતા. ભાજપની ટિકિટ પર તેઓ ૨૦૧૪ અને ૨૦૧૯માં એમ બે વાર લોકસભામાં ચૂંટાઈ આવ્યા હતા. જોકે, ૨૦૨૪ની લોકસભા ચૂંટણીમાં સપા ઉમેદવાર નીરજ મૌર્ય સામે ૧૫,૯૬૯ મતોથી પરાજય થયા બાદ તેઓ ફરી એકવાર સમાજવાદી પાર્ટીમાં પરત ફર્યા છે.

આ પ્રસંગે ધર્મેન્દ્ર કશ્યપની સાથે તેમની પુત્રી કીર્તિ કશ્યપ પણ સમાજવાદી પાર્ટીમાં સક્રિય થઈ છે. રાજકીય વર્તુળોમાં એવી જોરદાર ચર્ચા ચાલી રહી છે કે કીર્તિ કશ્યપ ૨૦૨૭ની ઉત્તર પ્રદેશ વિધાનસભા ચૂંટણીમાં સપાની ટિકિટ પર પોતાની નવી રાજકીય ઇનિંગ શરૂ કરી શકે છે. તેમના આગમનથી પછાત વર્ગના મતદારોમાં સમાજવાદી પાર્ટીનું પકડ વધુ મજબૂત બનશે તેવો દાવો પક્ષના વરિષ્ઠ નેતાઓ દ્વારા કરવામાં આવી રહ્યો છે.

આ અગાઉ પણ પૂર્વ આઈએએસ અધિકારી રામ બહાદુર પાસી સહિત મુઝફ્ફરનગર અને મેરઠના ભૂતપૂર્વ ઉમેદવારો, પૂર્વ ધારાસભ્યો અને સ્થાનિક નેતાઓએ સમાજવાદી પાર્ટીનો દામન થામ્યો હતો. અખિલેશ યાદવે નવા જોડાયેલા તમામ નેતાઓનું ઉષ્માભર્યું સ્વાગત કરતા જણાવ્યું હતું કે પૂર્વથી પશ્ચિમ સુધી રાજ્યમાં સપાનો પાયો વધુ મજબૂત થયો છે અને આગામી ચૂંટણીઓમાં પક્ષ જંગી બહુમતી સાથે વધુ બેઠકો જીતીને સરકાર બનાવશે.

ભૂતકાળમાં પણ મુલાયમ સિંહ યાદવની સરકારમાં રાજ્યમંત્રી રહી ચૂકેલા ધર્મેન્દ્ર કશ્યપનું સપામાં પુનરાગમન પક્ષ માટે વ્યૂહાત્મક રીતે અત્યંત મહત્વપૂર્ણ માનવામાં આવે છે. બરેલી અને બદાયૂં જિલ્લાના સ્થાનિક રાજકારણમાં તેમનો મોટો પ્રભાવ હોવાથી, સપા આ વિસ્તારમાં પોતાના સમીકરણો સુધારવામાં સફળ રહેશે. પક્ષ બદલવાની તેમની આ પરંપરાએ પ્રદેશના રાજકારણમાં નવો મોડ આણ્યો છે.

ઉત્તર પ્રદેશમાં ચૂંટણી નજીક આવતા જ રાજકીય પક્ષો વચ્ચે નેતાઓને પોતાની તરફ ખેંચવાની હોડ જામી છે. સમાજવાદી પાર્ટી દ્વારા સતત અન્ય પક્ષોના પ્રભાવશાળી નેતાઓને સામેલ કરવાની આ વ્યૂહરચના આગામી દિવસોમાં રાજ્યના રાજકીય સમીકરણો પર કેવી અસર છોડશે તેના પર સૌ કોઈની નજર ટકેલી છે.