​મેડ્રિડ: સ્પેનના ટોલેડો પ્રાંતમાં સર્જાયેલી એક અત્યંત ગંભીર અને ભીષણ ટ્રેન દુર્ઘટનાએ સમગ્ર દેશમાં રાજકીય ભૂકંપ સર્જ્યો છે. આ કરૂણાંતિકામાં ૬૮ લોકોનાં મોત નીપજ્યાં બાદ સ્પેનની રાજધાની મેડ્રિડ ખાતે આવેલી ટ્રાન્સપોર્ટ મિનિસ્ટ્રીની બહાર હજારોની સંખ્યામાં લોકો રસ્તા પર ઉતરી આવ્યા હતા. પ્રદર્શનો દરમિયાન જમણેરી જૂથો (Far-right groups) અને દમનકારી સુરક્ષા દળો વચ્ચે ઉગ્ર અથડામણ સર્જાઈ હતી.

​સરકાર વિરુદ્ધ ઉગ્ર સૂત્રોચ્ચાર અને પ્રદર્શન

મળતી માહિતી મુજબ, આશરે ૧,૫૦૦ જેટલા પ્રદર્શકારો મંત્રાલયની બહાર એકઠા થયા હતા. તેમણે દેશના વડાપ્રધાન પેડ્રો સાંચેઝ (Pedro Sánchez) અને ટ્રાન્સપોર્ટ મિનિસ્ટર ઓસ્કાર પુએન્ટે (Óscar Puente) વિરુદ્ધ ભારે નારેબાજી કરી હતી અને તેમના તાત્કાલિક રાજીનામાની માંગ કરી હતી. વિરોધ કરી રહેલા નાગરિકોએ સરકાર પર રેલવે સુરક્ષા પ્રત્યે બેદરકારી દાખવવાનો ગંભીર આરોપ લગાવ્યો હતો. પ્રદર્શન દરમિયાન કેટલાક લોકો દ્વારા નાઝી પ્રતીકો (Nazi symbols) પણ પ્રદર્શિત કરવામાં આવ્યા હોવાના અહેવાલો સામે આવ્યા છે.

​સ્થિતિ કાબૂમાં લેવા પોલીસ દ્વારા બળપ્રયોગ

પરિસ્થિતિ વધુ વણસતા પ્રદર્શકારો દ્વારા પોલીસ પર બોટલો અને ફ્લેર્સ ફેંકવામાં આવ્યા હતા, જેના કારણે વાતાવરણ તણાવપૂર્ણ બન્યું હતું. ભીડને નિયંત્રિત કરવા અને તિત્રિત કરવા માટે મેડ્રિડની રાઈટ પોલીસ (Riot Police) દ્વારા લાઠીચાર્જ કરવામાં આવ્યો હતો તેમજ ટિયર ગેસ (Tear Gas) ના શેલ છોડવામાં આવ્યા હતા. મોડી રાત સુધી મંત્રાલયની બહાર આ તણાવપૂર્ણ સ્થિતિ યથાવત રહી હતી.

​શું છે સમગ્ર ટ્રેન દુર્ઘટનાનું કારણ?

બુધવારે સવારે સ્પેનના ટોલેડો પ્રાંતના ઉર્દા શહેરમાં બે હાઈ-સ્પીડ ટ્રેનો વચ્ચે ભયંકર ટક્કર થઈ હતી. આ અકસ્માતમાં ૬૮ લોકોનાં મોત થયા છે જ્યારે ૫૦થી વધુ લોકો ઘાયલ થયા છે. પ્રારંભિક તપાસમાં સામે આવ્યું છે કે સિગ્નલ સિસ્ટમમાં નિષ્ફળતા બાદ કંટ્રોલ રૂમ દ્વારા રેન્ફ (Renfe) ટ્રેનને લાલ સિગ્નલ હોવા છતાં આગળ વધારવાની પરવાનગી આપવામાં આવી હતી, જેના કારણે પાટા પર પહેલેથી ઊભેલી અન્ય ટ્રેનને પાછળથી જોરદાર ટક્કર વાગી હતી. આ દુર્ઘટના બાદ સ્પેન સરકારે ત્રણ દિવસના રાષ્ટ્રીય શોકની જાહેરાત કરી છે, જ્યારે વિપક્ષી પાર્ટીઓ અને જમણેરી સંગઠનોએ સરકાર વિરુદ્ધ મોરચો ખોલ્યો છે.