મેલબોર્ન : ઓસ્ટ્રેલિયાના રાજકારણમાંથી એક અત્યંત ચોંકાવનારી અને ચિંતાજનક ઘટના સામે આવી છે. વિક્ટોરિયા રાજ્યના વાંગારાટા શહેરમાં આવેલા તેમના મતવિસ્તારની કચેરીની બહાર ઓસ્ટ્રેલિયાના સંઘીય સ્વતંત્ર સાંસદ હેલેન હેન્સને એક બેકાબૂ કારે જોરદાર ટક્કર મારી હતી, જેના કારણે તેઓ ગંભીર રીતે ઘાયલ થયા છે. આ ઘટના બાદ પોલીસ અને સુરક્ષા એજન્સીઓ હરકતમાં આવી ગઈ છે કારણ કે પ્રાથમિક તપાસમાં આ હુમલો ઈરાદાપૂર્વક કરવામાં આવ્યો હોવાની પ્રબળ શંકા વ્યક્ત કરવામાં આવી રહી છે.

પોલીસના સત્તાવાર નિવેદન અનુસાર, ૬૫ વર્ષીય હેલેન હેન્સ પોતાની ઓફિસ બહાર હતા ત્યારે એક ટોયોટા લેન્ડ ક્રૂઝર એસયુવી (SUV) કારે તેમને ટક્કર મારી હતી. ઘટનાસ્થળે જ ઉપસ્થિત સુરક્ષાકર્મીઓ અને પોલીસે તાત્કાલિક કાર્યવાહી કરીને ૪૩ વર્ષીય કાર ચાલકને ઝડપી લીધો હતો. જ્યારે પોલીસ દ્વારા કારની તલાશી લેવામાં આવી ત્યારે તેમાંથી એક છરી (કટર) પણ મળી આવી હતી, જેને પોલીસે જપ્ત કરી લીધી છે. ગંભીર ઈજાઓગ્રસ્ત હેન્સને તાત્કાલિક નજીકની હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે.

ઉલ્લેખનીય છે કે, હેલેન હેન્સ વર્ષ ૨૦૧૯માં પ્રથમ વખત ઓસ્ટ્રેલિયાની સંસદમાં ચૂંટાઈ આવ્યા હતા અને જનહિતના મુદ્દાઓ પર સક્રિય ભૂમિકા ભજવતા રહ્યા છે. આ ઘટના બાદ તેમના પરિવારે મીડિયા સમક્ષ તેમની ઓળખની પુષ્ટિ કરી છે. પકડાયેલા ડ્રાઈવરની સઘન પૂછપરછ ચાલી રહી છે કે આ કોઈ રાજકીય અદાવત કે પૂર્વ આયોજિત કાવતરાનો ભાગ હતો કે કેમ.

આ ઘટનાએ ઓસ્ટ્રેલિયામાં રાજકારણીઓ અને જાહેર જીવનની હસ્તીઓની સુરક્ષા સામે ગંભીર સવાલો ઊભા કર્યા છે. સત્તાવાળાઓ દ્વારા ચિંતા વ્યક્ત કરવામાં આવી છે કે છેલ્લા એક વર્ષમાં ઓસ્ટ્રેલિયામાં જાહેર પદો પર રહેલી હસ્તીઓ વિરુદ્ધ હિંસા અને ધમકીઓના ૧,૦૦૦થી વધુ બનાવો નોંધાયા છે, જેના કારણે લોકશાહીના પ્રતિનિધિઓનું જીવન જોખમમાં મુકાઈ રહ્યું છે.