સહારનપુર : ઉત્તર પ્રદેશના સહારનપુર ખાતે કલેક્ટરેટ સંકુલમાં આવેલી એક સદી જૂની વિવાદિત મસ્જિદને લઈને વહીવટી તંત્ર દ્વારા ગત શનિવારે વહેલી સવારે ૪ વાગ્યાના સુમારે ચાર મોટા બુલડોઝર અને ભારે પોલીસ ફોર્સ તથા આરએએફની હાજરીમાં તોડી પાડવામાં આવતા સમગ્ર રાજ્યમાં ભારે રાજકીય ગરમાવો અને વિવાદ વ્યાપી ગયો છે.

સિટી મેજિસ્ટ્રેટ કોર્ટ દ્વારા આ જમીનને સરકારી જાહેર કર્યા બાદ અને જિલ્લા ન્યાયાધીશની કોર્ટે મસ્જિદ સમિતિની પ્રથમ અપીલ ફગાવી દેતા આ કાર્યવાહી કરવામાં આવી હતી, જેના વિરોધમાં AIMIM વડા અસદુદ્દીન ઓવૈસીએ તીવ્ર પ્રતિક્રિયા આપતા જણાવ્યું હતું કે મસ્જિદ સમિતિએ ૧૯૧૧ના દસ્તાવેજો રજૂ કર્યા હોવા છતાં મુસ્લિમોની ધાર્મિક સ્વતંત્રતા પર સીધો હુમલો કરવામાં આવ્યો છે.

આ તોડફોડની કાર્યવાહી અગાઉ શુક્રવાર રાતથી જ કલેક્ટર કચેરીની બહાર રાજકીય ગતિવિધિઓ તેજ થઈ ગઈ હતી, જ્યાં કોંગ્રેસ સાંસદ ઇમરાન મસૂદ અને સપા સાંસદ ઇકરા હસન સહિતના નેતાઓને પોલીસે રોકવાનો પ્રયાસ કરતા ભારે ઘર્ષણ અને ઉગ્ર બોલાચાલી સર્જાઈ હતી, જ્યારે ડીઆઈજી અભિષેક સિંહે કાયદો અને વ્યવસ્થા જાળવવા તેમજ અફવાઓ ફેલાવનારાઓ સામે કડક પગલાં લેવાની ચેતવણી આપી છે.

આ સમગ્ર પ્રકરણની ભૂતકાળની કડીઓ જોઈએ તો છેલ્લા દોઢ વર્ષથી આ જમીનનો વિવાદ કોર્ટમાં ચાલી રહ્યો હતો, જેમાં વહિવટી તંત્રે તેને સરકારી મિલકત ગણાવી રૂ. ૬.૪૧ કરોડથી વધુનું વળતર લાદ્યું હતું, અને હવે કલેક્ટરેટ સંકુલમાં ડિમોલિશનની આ ઘટના બાદ તહેવારોની મોસમમાં સુરક્ષા વધુ સઘન બનાવી દેવામાં આવી છે તથા આગામી સમયમાં સોશિયલ મીડિયા પર નજર રાખીને શાંતિ ડહોળનારાઓ સામે કાનૂની શિસ્તભંગના પગલાં લેવામાં આવશે.