નવી દિલ્‍હી,તા.૨૮: દિલ્‍હી હાઈકોર્ટે સ્‍પષ્ટ કર્યું છે કે મુસ્‍લિમ પર્સનલ લો હેઠળ માન્‍ય ગણાતા લગ્ન પણ ૧૮ વર્ષથી ઓછી ઉંમરની પત્‍ની સાથે જાતીય સંબંધો બાંધવા બદલ પતિને ફોજદારી કાર્યવાહીથી રક્ષણ આપતા નથી.

જસ્‍ટિસ સંજીવ નારુની આગેવાની હેઠળની બેન્‍ચે કહ્યું કે પર્સનલ લો પોક્‍સો એક્‍ટ અને ભારતીય દંડ સંહિતા હેઠળ બાળકોને આપવામાં આવતી સુરક્ષાને ઓવરરાઇડ કરી શકતો નથી.

૧૬ વર્ષની છોકરી સાથે લગ્ન કરનાર ૨૮ વર્ષના પુરુષ સામે નોંધાયેલી FIR રદ કરવાનો ઇનકાર કરતી વખતે કોર્ટે આ અવલોકન કર્યું.

હાઇકોર્ટે લગ્નની નાગરિક માન્‍યતા અને સગીર સાથેના જાતીય સંબંધોના ફોજદારી પરિણામો વચ્‍ચે તફાવત કર્યો. કોર્ટે જણાવ્‍યું હતું કે POCSO હેઠળ, ૧૮ વર્ષથી ઓછી ઉંમરની વ્‍યક્‍તિ બાળક છે, અને તેમની સંમતિ જાતીય સંબંધોને માન્‍ય બનાવતી નથી.

ફોજદારી કાર્યવાહી સંહિતા (BNC) ની કલમ ૬૩ પણ ૧૮ વર્ષથી ઓછી ઉંમરની ષી સાથેના જાતીય સંબંધોને બળાત્‍કાર માને છે, અને વૈવાહિક અપવાદ ૧૮ વર્ષથી ઓછી ઉંમરની પત્‍નીને લાગુ પડતો નથી.

કોર્ટે જણાવ્‍યું હતું કે લગ્ન બાળકની ઉંમર વધારતા નથી. લગ્ન પહેલાં ૧૬ વર્ષની વ્‍યક્‍તિ લગ્ન પછી પણ ૧૬ વર્ષની રહે છે. FIR રદ કરવાની સાથે, કોર્ટે પોલીસ અધિકારી સામે કાર્યવાહી અને વળતરની માંગને પણ ફગાવી દીધી હતી.

આ કેસમાં, પુરુષ પર ભારતીય દંડ સંહિતાની કલમ ૬૪(૧) અને જાતીય ગુનાઓથી બાળકોના રક્ષણ (POCSO) કાયદાની કલમ ૬ હેઠળ આરોપ મૂકવામાં આવ્‍યો હતો. લગ્ન પછી, દંપતી સાથે રહેતા હતા અને મહિલા ગર્ભવતી થઈ હતી. ગર્ભાવસ્‍થા દરમિયાન, સરકારી હોસ્‍પિટલમાં તપાસ દરમિયાન તેની ઉંમર જાહેર થઈ હતી.

અરજીમાં, દંપતીએ દાવો કર્યો હતો કે લગ્ન બંને પક્ષો અને તેમના પરિવારોની સંમતિથી થયા હતા. તેમણે દલીલ કરી હતી કે મુસ્‍લિમ અંગત કાયદા હેઠળ, એક મુસ્‍લિમ છોકરી જે તરુણાવસ્‍થા પ્રાપ્ત કરી ચૂકી છે તે લગ્ન માટે સક્ષમ છે, અને તેથી, લગ્ન પછી બનેલા સંબંધને ગુનો ગણવો જોઈએ નહીં