વારાણસી:  પોતાના સંસદીય ક્ષેત્ર કાશીના બે દિવસીય પ્રવાસે આવેલા પ્રધાનમંત્રી નરેન્દ્ર મોદીએ રવિવારે વારાણસીને ₹6,350 કરોડના વિવિધ વિકાસલક્ષી પ્રોજેક્ટ્સની ભેટ ધરીને સમગ્ર દેશમાં એક નવો ઉત્સાહ જગાવ્યો છે. ગંગાના કિનારેથી દેશની બહેનો અને દીકરીઓને સંબોધતા પીએમ મોદીએ ભાવુક સ્વરે કહ્યું કે, "કાશી પોતે દૈવી શક્તિઓની ભૂમિ છે અને આજે આ દિવ્યતા અહીં હાજર હજારો માતા-બહેનોના આશીર્વાદથી વધી ગઈ છે." આ મુલાકાત દરમિયાન તેમણે કાશી-પુણે અને અયોધ્યા-મુંબઈ વચ્ચે દોડનારી અત્યાધુનિક 'અમૃત ભારત એક્સપ્રેસ' ટ્રેનોને લીલી ઝંડી બતાવીને ઉત્તર પ્રદેશ અને મહારાષ્ટ્ર વચ્ચેની કનેક્ટિવિટીને નવો આયામ આપ્યો છે.

પીએમ મોદીએ તેમના સંબોધનમાં મહિલા અનામત બિલ (નારી શક્તિ વંદન અધિનિયમ) મુદ્દે વિરોધ પક્ષોને આડે હાથ લીધા હતા. તેમણે સ્પષ્ટ શબ્દોમાં જણાવ્યું કે ભૂતકાળમાં કોંગ્રેસ અને સપા જેવા પક્ષોના અવરોધોને કારણે જે કામ અટકી પડ્યું હતું, તેને હવે કોઈ રોકી શકશે નહીં. તેમણે ગેરંટી આપતા કહ્યું કે, "હું ખાતરી આપું છું કે મહિલાઓને તેમનો અનામતનો અધિકાર મળીને જ રહેશે." પીએમ મોદીએ ભારપૂર્વક જણાવ્યું કે જ્યારે તેઓ 'વિકસિત ભારત'નું સપનું જુએ છે, ત્યારે તેનો સૌથી મજબૂત સ્તંભ ભારતની અડધી આબાદી એટલે કે મહિલા શક્તિ જ છે.

છેલ્લા 11 વર્ષની સિદ્ધિઓ ગણાવતા પ્રધાનમંત્રીએ કહ્યું કે તેમની સરકારની દરેક યોજનાના કેન્દ્રમાં મહિલાઓ રહી છે. શૌચાલયના નિર્માણથી લઈને ગેસ કનેક્શન અને બેંક ખાતા ખોલાવવા સુધીની સફરનો ઉલ્લેખ કરતા તેમણે ગર્વ સાથે જણાવ્યું કે દેશભરમાં 3 કરોડ બહેનો હવે 'લખપતિ દીદી' બની ચૂકી છે. સ્વ-સહાય જૂથો દ્વારા મહિલાઓની આર્થિક ભાગીદારી વધારવાના પ્રયાસો રંગ લાવી રહ્યા છે. કાશી અને અયોધ્યા વચ્ચેના સુધરી રહેલા રસ્તાઓ અને રેલવે કનેક્ટિવિટી માત્ર પર્યટન જ નહીં પરંતુ સામાન્ય માણસના જીવનને પણ સરળ બનાવી રહી છે.