નવી દિલ્હી : દિલ્હીના જંતર-મંતર સહિત દેશભરમાં NEET UG પરીક્ષાના પેપર લીક અંગે વિદ્યાર્થીઓનો વિરોધ પ્રદર્શન ચાલુ છે, ત્યારે શુક્રવારે યોજાયેલી કેન્દ્રીય કેબિનેટની બેઠકમાં વડાપ્રધાન નરેન્દ્ર મોદીએ પોતાના મંત્રીઓને ડિજિટલ યુગ સાથે તાલ મિલાવવાનો એક અનોખો અને મહત્વપૂર્ણ મંત્ર આપ્યો છે. સૂત્રોના જણાવ્યા અનુસાર, પીએમ મોદીએ બેઠક દરમિયાન મંત્રીઓને પૂછ્યું હતું કે તેમનામાંથી કેટલા મંત્રીઓ ઇન્સ્ટાગ્રામ પર સક્રિય છે. તેમણે ભારપૂર્વક જણાવ્યું કે આજના યુવાનો ઇન્સ્ટાગ્રામ પર સૌથી વધુ સમય વિતાવે છે, તેથી દરેક મંત્રીએ રીલ્સ પોસ્ટ કરવી જોઈએ અને યુવાનો સુધી સરકારની વાત પહોંચાડવા સતત કનેક્ટેડ રહેવું જોઈએ.

પેપર લીક કરનારાઓ સામે કડક કાયદો: ફાસ્ટ-ટ્રેક કોર્ટની જોગવાઈ

દેશભરમાં ચાલતા વિદ્યાર્થી આંદોલન અને NEET પેપર લીક વિવાદ વચ્ચે કેન્દ્રીય કેબિનેટે એક મહત્વપૂર્ણ સુધારા બિલના ડ્રાફ્ટને મંજૂરી આપી દીધી છે. વડાપ્રધાન નરેન્દ્ર મોદીની અધ્યક્ષતામાં મળેલી આ બેઠકમાં લેવાયેલા નિર્ણયો મુજબ:

·         ફાસ્ટ-ટ્રેક કોર્ટ: પેપર લીકના કેસોની ઝડપી સુનાવણી અને દોષિતોને તાત્કાલિક સજા આપવા માટે વિશેષ ફાસ્ટ-ટ્રેક કોર્ટની સ્થાપના કરાશે.

·         ભારે દંડ અને કડક સજા: યુવાનોના ભવિષ્ય સાથે ચેડા કરનાર વિરોધી તત્વો સામે ભારે આર્થિક દંડ અને જેલની કડક જોગવાઈઓ સામેલ કરવામાં આવી છે.

·         ચોમાસુ સત્રમાં રજૂઆત: સરકાર આ સંબંધિત બિલ સંસદના વર્તમાન ચોમાસુ સત્રના બીજા અઠવાડિયામાં જ પસાર કરાવવા માટે રજૂ કરશે.

શિક્ષામંત્રીના રાજીનામા અંગે સ્પષ્ટતા

બીજી તરફ, દિલ્હીના જંતર-મંતર ખાતે કોકરોચ જનતા પાર્ટી (CJP) અને વિવિધ વિદ્યાર્થી સંગઠનો દ્વારા કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગણી સાથે વિરોધ પ્રદર્શન કરવામાં આવી રહ્યું છે. જોકે, સરકારી સૂત્રોએ સ્પષ્ટ કર્યું છે કે શિક્ષણ મંત્રી પોતાના પદ પરથી રાજીનામું આપશે નહીં, કારણ કે હાલની પરિસ્થિતિમાં રાજીનામું આપવું એ જવાબદારીમાંથી ભાગવા સમાન ગણાશે. સરકાર જનતાના જનાદેશ અને યુવાનોના ભવિષ્યને સુરક્ષિત કરવા માટે પોતાની જવાબદારીઓ પૂર્ણપણે નિભાવશે.