રશિયા-યુક્રેન યુદ્ધ વચ્ચે પીએમ મોદી અને ઝેલેન્સકી વચ્ચે મહત્ત્વપૂર્ણ ટેલિફોનિક ચર્ચા
ભારતે માનવતાવાદી અભિગમ દોહરાવીને શાંતિ સ્થાપવા માટે સહયોગની દીધી ખાતરી : ઝેલેન્સકીએ વર્તમાન યુદ્ધ પરિસ્થિતિની આપી વિગતવાર જાણકારી
નવી દિલ્હી, તા.૧૩: રશિયા અને યુક્રેન વચ્ચે લાંબા સમયથી ચાલી રહેલા વિનાશક યુદ્ધના માહોલ વચ્ચે વૈશ્વિક રાજનીતિમાંથી એક મોટા સમાચાર સામે આવ્યા છે. વડાપ્રધાન નરેન્દ્ર મોદીએ સોમવારે યુક્રેનના રાષ્ટ્રપતિ વોલોડીમીર ઝેલેન્સકી સાથે ટેલિફોન પર વિસ્તળત વાતચીત કરી છે. આ વાતચીત દરમિયાન રાષ્ટ્રપતિ ઝેલેન્સકીએ પીએમ મોદીને યુદ્ધ ક્ષેત્રની વર્તમાન પરિસ્થિતિ અને તાજેતરના વિકાસથી વાકેફ કર્યા હતા. બંને નેતાઓ વચ્ચે થયેલી આ મહત્ત્વપૂર્ણ ચર્ચા એવા સમયે થઈ છે જ્યારે આંતરરાષ્ટ્રીય સ્તરે યુદ્ધનો અંત લાવવા માટેના રાજદ્વારી પ્રયાસો તેજ બન્યા છે.
ટેલિફોનિક વાતચીત દરમિયાન વડાપ્રધાન મોદીએ સ્પષ્ટ શબ્દોમાં ભારતની કાલાતીત વિદેશનીતિનું પુનરાવર્તન કરતા જણાવ્યું હતું કે, કોઈપણ સંઘર્ષ કે વિવાદનો કાયમી ઉકેલ યુદ્ધના મેદાનમાં નહીં પરંતુ માત્ર વાતચીત અને રાજદ્વારી (ડિપ્લોમસી) માર્ગ દ્વારા જ શોધી શકાય છે. પીએમ મોદીએ ભારતના ‘માનવ-કેન્દ્રિત અભિગમ' પર ભાર મૂકતા યુદ્ધગ્રસ્ત યુક્રેનવાસીઓ માટે માનવતાવાદી સહાય પૂરી પાડવાની પ્રતિબદ્ધતા વ્યક્ત કરી હતી. તેમણે આંતરરાષ્ટ્રીય શાંતિ અને સ્થિરતા પુનઃસ્થાપિત કરવા માટે ભારત તરફથી દરેક સંભવ પ્રયાસોમાં યોગદાન આપવાની તત્પરતા પણ દર્શાવી હતી.
આ બેઠક માત્ર યુદ્ધ પૂરતી મર્યાદિત નહોતી, પરંતુ બંને નેતાઓએ ભારત અને યુક્રેન વચ્ચેના દ્વિપક્ષીય સંબંધોને વધુ મજબૂત બનાવવા પર પણ સઘન મંથન કર્યું હતું. સોશિયલ મીડિયા પ્લેટફોર્મ એક્સ (X) પર પોતાના વિચારો વ્યક્ત કરતા પીએમ મોદીએ આ વાતચીતને અત્યંત ફળદાયી ગણાવી હતી અને બંને દેશોના પરસ્પર હિત માટે વેપાર, ટેકનોલોજી અને અન્ય ક્ષેત્રોમાં સહયોગ વધારવા સંમતિ સધાઈ હોવાનું જણાવ્યું હતું. વૈશ્વિક સ્તરે ભારતની આ મધ્યસ્થી અને શાંતિવાદી પહેલને અત્યંત સકારાત્મક અને મહત્ત્વપૂર્ણ પગલા તરીકે જોવામાં આવી રહી છે
(11:10 AM IST)
છેલ્લા 8 દિવસમાં સૌથી લોકપ્રિય 
