નવી દિલ્હી:  સરકારની કામગીરીની જૂની અને ઢીલી ઢબને બદલવા માટે વડા પ્રધાન નરેન્દ્ર મોદીએ મંગળવારે દેશના ટોચના વહીવટી અધિકારીઓ અને વિવિધ મંત્રાલયોના સચિવો  નો એક અભૂતપૂર્વ અને કડક ક્લાસ લીધો હતો. સતત ચાર કલાક સુધી ચાલેલી આ હાઈ-પ્રોફાઈલ બેઠકમાં પીએમ મોદી સંપૂર્ણ એક્શન મોડમાં જોવા મળ્યા હતા. તેમણે ઓફિસરોને સ્પષ્ટ અને આકરા શબ્દોમાં ચેતવણી આપી હતી કે હવે કાગળ પર માત્ર મોટા નિર્ણયો ગણાવવાનો સમય પૂરો થઈ ગયો છે, હવે જમીન પર તેની શું અસર થઈ તે સાબિત કરવાનો સમય છે. પ્રધાનમંત્રીએ સત્તાધારી અમલદારોને આદેશ આપ્યો કે સરકારી યોજનાઓને ફાઈલોના પિંજરામાંથી મુક્ત કરો, કારણ કે દેશની જનતાને પરિવર્તન કાગળ પર નહીં પણ પોતાના રોજિંદા જીવનમાં દેખાવું જોઈએ.

આ મેરેથોન બેઠક મુખ્યત્વે બે મહત્વપૂર્ણ એજન્ડા પર કેન્દ્રિત હતી - 'વ્યવસાય કરવાની સરળતા' (Ease of Doing Business) તેમજ 'જીવન જીવવાની સરળતા' (Ease of Living) માટે બિનજરૂરી અને જૂના પુરાણા કાયદાઓ નાબૂદ કરવા, અને બીજું 'આત્મનિર્ભર ભારત'ના સંકલ્પને રોકેટ ગતિ આપવી. પીએમ મોદીએ જુદા જુદા વિભાગો વચ્ચે ચાલતી જૂની ખેંચતાણ અને એકલા હાથે કામ કરવાની પદ્ધતિ (Silo Culture) પર પ્રહાર કરતા "હોલ ઓફ ગવર્મેન્ટ" (સમગ્ર સરકાર) મોડેલ અપનાવવા પર ભાર મૂક્યો હતો. તેમણે સ્પષ્ટ કર્યું કે સરકારના અલગ-અલગ મંત્રાલયો વચ્ચે અદભુત સંકલન હોવું એ આજના સમયની સૌથી મોટી જરૂરિયાત છે, અને તે વિના કોઈ પણ મોટી રાષ્ટ્રીય યોજના સફળ થઈ શકે નહીં.

વડા પ્રધાને આ બેઠકમાં ડિજિટલ ઈન્ફ્રાસ્ટ્રક્ચર 'પીએમ ગતિશક્તિ પ્લેટફોર્મ'નો મહત્તમ ઉપયોગ કરવાની પણ કડક સલાહ આપી હતી, જેથી યોજનાઓનું આયોજન ઝડપી બને અને અમલશાહીના કારણે થતો વિલંબ અટકાવી શકાય. જો કે, આ બેઠકમાં કોઈ નવી યોજના કે મોટી નીતિગત જાહેરાત કરવામાં આવી ન હતી, પરંતુ ભવિષ્યના શાસનને અત્યંત પ્રભાવશાળી અને પરિણામલક્ષી બનાવવા માટે આ મીટિંગ માઈલસ્ટોન સાબિત થશે. પીએમ મોદીએ સચિવોને છેલ્લી ટકોર કરતા કહ્યું કે, કોઈપણ યોજનાની સફળતાનું સાચું માપદંડ તેની ફાઈલનું કદ કે બજેટની રકમ નથી, પરંતુ સમાજના છેવાડાના સામાન્ય માનવીના ચહેરા પર આવેલી મુસ્કાન છે.