નવી દિલ્હી: તા. ૨૩ જૂન, ૨૦૨૬: ભારતીય ક્રિકેટ જગતમાં પોતાની વિસ્ફોટક અને તોફાની બેટિંગથી સનસનાટી મચાવનારા યુવા સનસનાટી વૈભવ સૂર્યવંશીના હવે દેશના પ્રધાનમંત્રી નરેન્દ્ર મોદી પણ મુક્તકંઠે પ્રશંસક બન્યા છે. ભારતીય જનતા પાર્ટી (BJP) એ પોતાના સત્તાવાર ‘એક્સ’ (અગાઉનું ટ્વિટર) હેન્ડલ પર પીએમ મોદીનો એક અત્યંત રસપ્રદ વીડિયો શેર કર્યો છે, જેમાં તેઓ વૈભવ સૂર્યવંશીની પ્રશંસા કરવાની સાથે દેશની નવી પેઢી એટલે કે ‘Gen Z’ ને એક ખાસ અને મજેદાર અંદાજમાં સલાહ આપતા જોવા મળી રહ્યા છે.
વીડિયોમાં પ્રધાનમંત્રી નરેન્દ્ર મોદીએ દેશના યુવાનોને સંબોધિત કરતા કહ્યું હતું કે, "આવા અદભુત ખેલાડીઓનું કેરેક્ટર (સ્વભાવ અને રમત) સમજવું દેશ માટે અને ખાસ કરીને મારા દેશના યુવાનો માટે અત્યંત જરૂરી છે." પીએમ મોદીએ પોતાની આગવી શૈલીમાં નવી પેઢીને ટાંકતા ઉમેર્યું કે, "આપણી Gen Z એ તો આ વાત બહુ ઝડપથી સમજી લેવી જોઈએ. જલ્દી સમજી જાઓ, નહીંતર સૂર્યવંશી આવ્યો છે, તે બહુ તેજ ગતિથી (ફાસ્ટ ફોરવર્ડ મોડમાં) સમજાવે છે!"
પીએમ મોદીના આ નિવેદન બાદ સોશિયલ મીડિયા પર વૈભવ સૂર્યવંશીને લઈને ફેન્સમાં જબરદસ્ત ક્રેઝ જોવા મળી રહ્યો છે. વૈભવની ક્રિકેટ પિચ પરની જે આક્રમકતા અને સ્પીડ છે, તેને દેશના વડાપ્રધાને જે રીતે યુવાનોના ઉત્સાહ અને ઝડપ સાથે જોડીને પ્રસ્તુત કરી, તે સોશિયલ મીડિયા યુઝર્સને ખૂબ પસંદ આવી રહી છે. રાજનીતિ અને રમતગમતના આ અનોખા તાલમેલવાળો આ વીડિયો હાલ ઇન્ટરનેટ પર જોતજોતામાં વાયરલ થઈ ગયો છે.