લંડન: બ્રિટનની રાજધાની લંડનમાં આજે વર્ષોનો સૌથી મોટો અને અત્યંત સંવેદનશીલ ગણાતો દિવસ હોવાને કારણે સમગ્ર બ્રિટન હાઈ એલર્ટ પર છે. એક તરફ લંડનમાં પ્રખ્યાત FA કપની ફાઇનલ મેચનું આયોજન થઈ રહ્યું છે, તો બીજી તરફ પરસ્પર વિરોધી વિચારધારા ધરાવતા અંદાજે 80,000 જેટલા વિરોધીઓ રાજધાનીની શેરીઓમાં આમને-સામને ઉતરી રહ્યા છે. આ મહાસંકટને ટાળવા માટે બ્રિટિશ સરકારે અભૂતપૂર્વ £4.5 મિલિયન (અંદાજે 46 કરોડ રૂપિયા) ના તોતિંગ ખર્ચે એક વિશાળ પોલીસ ઓપરેશન શરૂ કર્યું છે. આ ગંભીર પરિસ્થિતિ વચ્ચે બ્રિટનના વડા પ્રધાન કીર સ્ટાર્મરે દેશને સંબોધતા કડક શબ્દોમાં ચેતવણી આપી છે કે, "આપણે આ દેશના આત્મા અને અખંડિતતાને બચાવવા માટે એક મોટી લડાઈ લડી રહ્યા છીએ."
લંડનમાં સ્થિતિ એટલી હદે નાજુક છે કે બ્રિટનની સૌથી મોટી પોલીસ ફોર્સ 'સ્કોટલેન્ડ યાર્ડ' દ્વારા પાછલા એક દાયકામાં પહેલીવાર જાહેર રસ્તાઓ પર બખ્તરબંધ વાહનો (Armoured Vehicles) ઉતારવાની ફરજ પડી છે. શહેરમાં શાંતિ જાળવી રાખવા અને તોફાનો રોકવા માટે 4,000 થી વધુ હથિયારધારી પોલીસ અધિકારીઓને મેદાનમાં ઉતારવામાં આવ્યા છે.
દૂર-જમણેરીઓ અને પેલેસ્ટાઇન સમર્થકો વચ્ચે પ્રચંડ ટક્કરની સંભાવના
આ તણાવનું મુખ્ય કારણ લંડનમાં એક જ દિવસે યોજાઈ રહેલી બે વિરોધી કૂચ (Marches) છે. જેમાં એક બાજુ કટ્ટર જમણેરી વિચારધારા ધરાવતા કાર્યકર્તા ટોમી રોબિન્સનની આગેવાની હેઠળ 'યુનાઇટ ધ કિંગડમ' રેલી યોજાઈ રહી છે, તો બીજી બાજુ 1948 માં ઇઝરાયલની સ્થાપના સમયે વિસ્થાપિત થયેલા પેલેસ્ટિનીઓની યાદમાં 'નકબા દિવસ' (Nakba Day) નિમિત્તે પેલેસ્ટાઇન તરફી દેખાવકારોનું વિશાળ પ્રદર્શન યોજાઈ રહ્યું છે. વડા પ્રધાન કીર સ્ટાર્મરે મેટ્રોપોલિટન પોલીસના કમાન્ડ એન્ડ કંટ્રોલ રૂમની મુલાકાત લીધા બાદ જણાવ્યું કે, આ રેલીઓના આયોજકો દેશમાં માત્ર નફરત અને વિભાજન ફેલાવવાનું કામ કરી રહ્યા છે, જે ક્યારેય ચલાવી લેવાશે નહીં.
કાયદો તોડનારાઓને જેલના સળિયા પાછળ ધકેલવા નવી ગાઇડલાઇન
બ્રિટનના પબ્લિક પ્રોસિક્યુશનના ડિરેક્ટર સ્ટીફન પાર્કિન્સને પ્રોસિક્યુટર્સ માટે નવી કડક માર્ગદર્શિકા જાહેર કરી છે. આ નવા નિયમ હેઠળ, જો કોઈ પણ વિરોધ પ્રદર્શન દરમિયાન વિવાદાસ્પદ પ્લેકાર્ડ, બેનરો, સોશિયલ મીડિયા પોસ્ટ કે ઉશ્કેરણીજનક નારાબાજી દ્વારા નફરત ભડકાવવાનો પ્રયાસ કરશે, તો તેને ગંભીર ગુનો ગણીને તાત્કાલિક ધરપકડ કરવામાં આવશે. પબ્લિક ઓર્ડર એક્ટ હેઠળ આ ગુના માટે ગુનેગારને સીધી 7 વર્ષ સુધીની સખત જેલની સજા થઈ શકે છે. બ્રિટિશ સરકારે કડક વલણ અપનાવતા હિંસા ભડકાવી શકે તેવા 11 વિદેશી દૂર-જમણેરી આંદોલનકારીઓને દેશમાં પ્રવેશતા પહેલા જ એરપોર્ટ પરથી અટકાવી દીધા છે.
બ્રિટિશ પોલીસ દળ શારીરિક અને માનસિક રીતે થાક્યું:
આ ભયાનક તણાવ વચ્ચે મેટ્રોપોલિટન પોલીસ ફેડરેશનના અધ્યક્ષ પૌલા ડોડ્સે ચિંતા વ્યક્ત કરતા એક નિવેદનમાં જણાવ્યું છે કે, "લંડનની શેરીઓમાં સતત ચાલી રહેલા વિરોધ પ્રદર્શનોના પ્રવાહને કારણે અમારું પોલીસ દળ અત્યારે ગંભીર રીતે ઓવર-સ્ટ્રેચ્ડ (વધુ પડતું ખેંચાઈ) ગયું છે. કાયદો અને વ્યવસ્થા જાળવી રાખવા માટે અત્યારે અમારી પાસે પૂરતા અધિકારીઓ નથી અને જેઓ ફરજ પર છે તેઓ માનસિક અને શારીરિક રીતે સંપૂર્ણપણે થાકી ચૂક્યા છે."
બીજી તરફ, આ માર્ચના રૂટને કારણે સ્થાનિક યહૂદી સમુદાયના લોકોમાં પણ ભયનો માહોલ છે, કારણ કે વેસ્ટમિન્સ્ટર સિનાગોગ (યહૂદી પ્રાર્થનાલય) માંથી બહાર નીકળતા ભક્તોએ આ નકબા રેલીના રૂટ પરથી જ પસાર થવું પડશે અને પોલીસે સુરક્ષાના કારણોસર રેલીનો રૂટ ડાયવર્ટ કરવાનો સ્પષ્ટ ઇનકાર કરી દીધો છે.