શાંઘાઈ, : દક્ષિણ-પશ્ચિમ ચીનના સિચુઆન પ્રાંતના ચેંગદુથી શાંઘાઈ જઈ રહેલી ચાઇના ઇસ્ટર્ન એરલાઇન્સની એક ડોમેસ્ટિક ફ્લાઇટમાં લેન્ડિંગ બાદ મોટી ટેકનિકલ ખામી સર્જાઈ હતી. શાંઘાઈ હોંગકિયાઓ આંતરરાષ્ટ્રીય એરપોર્ટ પર ઉતરાણ કર્યા બાદ જ્યારે વિમાન ધીમે ધીમે ગેટ તરફ ટેક્સી કરી રહ્યું હતું, ત્યારે અચાનક વિમાનનો એક હિસ્સો જેબ્રિજ (Jet Bridge) સાથે અથડાઈ ગયો હતો.
મુસાફરોના અનુભવ અને અકસ્માતની તીવ્રતા
ઘટના સમયે વિમાનમાં હાજર 'લિયુ' નામના મુસાફરના જણાવ્યા અનુસાર, પ્લેન જ્યારે પાર્કિંગ તરફ જઈ રહ્યું હતું ત્યારે તેનો આગળનો ભાગ (Nose) નિર્ધારિત પોઇન્ટથી સહેજ આગળ નીકળી ગયો હતો. કેબિનની અંદર બેઠેલા મુસાફરોને જોરદાર અથડાવાનો અવાજ સંભળાયો હતો અને ત્યારબાદ તરત જ એન્જિનનું થ્રસ્ટ ઉલટું (Reverse Thrust) કરવામાં આવ્યું હતું. સોશિયલ મીડિયા પર વાયરલ થયેલા વીડિયો ફૂટેજ મુજબ વિમાનનો ડાબો હિસ્સો જેબ્રિજ સાથે અથડાયો હતો, જેના કારણે તે માળખાને પણ આંશિક નુકસાન પહોંચ્યું હતું.
તંત્રની કાર્યવાહી અને વળતર
એરલાઇન્સે સત્તાવાર નિવેદન જારી કરીને પુષ્ટિ કરી છે કે વિમાનમાં સવાર તમામ મુસાફરો સુરક્ષિત છે અને તેમને વ્યવસ્થિત રીતે બહાર કાઢવામાં આવ્યા છે. અકસ્માત બાદ મુસાફરોને અડધા કલાકથી વધુ સમય સુધી વિમાનની અંદર જ બેસી રહેવું પડ્યું હતું અને બાદમાં બીજી તરફના દરવાજેથી ઉતારવામાં આવ્યા હતા. એરલાઇન્સે આ અસુવિધા બદલ માફી માંગી છે અને દરેક મુસાફરને ૩૦૦ યુઆન (આશરે ૪૪ અમેરિકી ડોલર)નું વળતર આપ્યું છે. હાલમાં એરલાઇન્સ અને સુરક્ષા અધિકારીઓ આ ટેકનિકલ ખામીના ચોક્કસ કારણની તપાસ કરી રહ્યા છે.