મુંબઈ, તા.૧૩: કોવિડ-૧૯ મહામારીનું જોખમ પૂર્ણ થયાના ભ્રમ વચ્ચે હવે વાયરસના એક નવા અને અત્યંત ખતરનાક વેરિઅન્ટ PJ.2.1 એ એશિયાઈ દેશોમાં દસ્તક દીધી છે, જેના કારણે વૈશ્વિક સ્તરે સ્વાસ્થ્ય નિષ્ણાતોની ચિંતામાં ભારે વધારો થયો છે.

વૈજ્ઞાનિક અહેવાલો અનુસાર ગત ૨ મેના રોજ કેનેડાના ઓન્ટારિયો પ્રાંતમાં સૌપ્રથમ દેખાયેલો આ વાયરસ ઝડપથી સરહદો ઓળંગીને અમેરિકાના ન્યૂ યોર્ક, કેલિફોર્નિયા સહિતના ભાગોમાં ફેલાયા બાદ હવે સિંગાપોર, ઓસ્ટ્રેલિયા, ન્યુઝીલેન્ડ અને યુરોપના દેશો સુધી પહોંચી ગયો છે.

વાયરસશાસ્ત્રીઓ આ નવા સ્વરૂપને 'સોલ્ટેશન' વેરિઅન્ટ તરીકે માને છે, જે લાંબા સમય સુધી ચેપગ્રસ્ત શરીરમાં રહેવાના કારણે થતા જટિલ મ્યુટેશનથી બને છે અને શરીરની રોગપ્રતિકારક શક્તિ સામે લાંબો સમય ટકી રહેવાની ક્ષમતા ધરાવે છે.

તાજેતરના અભ્યાસોમાં BA.3.2.2, LP.8.1 અને XFG જેવા અન્ય પ્રાદેશિક વેરિઅન્ટ્સ પણ તપાસવામાં આવ્યા છે, જેમાં અગાઉ સામાન્ય રહેલો BA.3.2.2 વેરિઅન્ટ ધીમો પડતા તેની જગ્યાએ PJ.2.1 એ જોખમ વધાર્યું હોવાનું સામે આવ્યું છે.

જોકે કેટલીક રસીઓના એન્ટિબોડીઝ આ નવા પ્રકાર સામે સુરક્ષા પૂરી પાડવામાં અસરકારક સાબિત થયા છે, તેમ છતાં વાયરસનું આ પ્રકારે સતત સ્વરૂપ બદલવું એ શિયાળાની મોસમમાં વધતા જોખમ સામે સ્પષ્ટ ચેતવણી સમાન છે.

આ સ્થિતિને ધ્યાનમાં રાખીને આરોગ્ય સંસ્થાઓ અને સરકારો દ્વારા વાયરસના ફેલાવા પર સતત નજર રાખવામાં આવી રહી છે તથા આગામી સમયમાં સંભવિત જોખમને પહોંચી વળવા માટે સાવચેતીના પગલાં મજબૂત કરવામાં આવી રહ્યા છે.