નવી દિલ્હી :  પશ્ચિમ એશિયામાં વધી રહેલા યુદ્ધ અને તણાવના કારણે વિશ્વભરમાં ક્રૂડ ઓઈલના ભાવ સતત વધી રહ્યા છે, જેનાથી ભારતમાં પીવાનું પાણી પણ પેટ્રોલ કરતાં મોંઘું લાગવા માંડે તેવી સ્થિતિ છે. જોકે, વૈશ્વિક ઇંધણ બજારમાં હલચલ મચાવનાર દેશ ઈરાનમાં ચિત્ર બિલકુલ ઊલટું છે. ઈરાનમાં સ્થાનિક નાગરિકો માટે પેટ્રોલ એક લિટર પીવાના પાણીની બોટલ (રૂ. ૧૫ થી ૨૦) કરતાં પણ સસ્તા દરે વેચાઈ રહ્યું છે.

આ ભારે ડિસ્કાઉન્ટ પાછળ ઈરાની સરકારની મજબૂત સબસિડી નીતિ અને ત્રણ-સ્તરીય ફ્યુઅલ કાર્ડ સિસ્ટમ જવાબદાર છે, જે હેઠળ નાગરિકોને અલગ-અલગ ટેરિફથી ઇંધણ આપવામાં આવે છે.

સોશિયલ મીડિયા પર વાયરલ થયેલા એક અહેવાલ મુજબ, ભારતથી રોડ ટ્રીપ પર ઈરાન ગયેલા પ્રવાસીઓએ પોતાના વાહનમાં ૩૩ લિટર પેટ્રોલ ભરાવ્યું હતું. સ્થાનિક ફ્યુઅલ કાર્ડ ન હોવાથી પેટ્રોલ પંપના કર્મચારીએ પોતાના કાર્ડનો ઉપયોગ કર્યો હતો. ભારતીય ચલણમાં ગણતરી કરતા આખી ૩૩ લિટરની ટાંકી માત્ર ૨૭૦ રૂપિયામાં ભરાઈ ગઈ હતી, એટલે કે પ્રતિ લિટર ઇંધણનો ખર્ચ માત્ર રૂ. ૮.૧૮ આવ્યો હતો. એક તરફ હોર્મુઝ સ્ટ્રેટ બંધ થવાથી વિશ્વભરમાં સીએનજી અને પેટ્રોલ-ડીઝલના ભાવ આસમાને પહોંચી રહ્યા છે, તો બીજી તરફ ઈરાન પોતાની અનોખી નીતિને કારણે આ મોંઘવારીની અસરથી મુક્ત દેખાઈ રહ્યું છે.