બેંગલુરુ: સોશિયલ મીડિયા પર અવારનવાર વિચિત્ર ફૂડ એક્સપેરિમેન્ટ્સ વાયરલ થતાં હોય છે, પરંતુ આ વખતે એક એવો પ્રયોગ સામે આવ્યો છે જેણે ખવડાઈ પ્રેમીઓ અને ખાસ કરીને સાઉથ ઈન્ડિયન વાનગીઓના ચાહકોના રોમેરોમમાં ગુસ્સો ભરી દીધો છે. દક્ષિણ ભારતની અત્યંત લોકપ્રિય, હળવી અને બાફેલી વાનગી ઈડલીમાં ઉત્તર ભારતની સ્પાઈસી 'બટર ચિકન'નું સ્ટફિંગ કરીને એક નવો જ અવતાર રજૂ કરવામાં આવ્યો છે. 10-મિનિટ ફૂડ ડિલિવરી સ્ટાર્ટઅપ 'સ્વિશ' (Swish) દ્વારા લોન્ચ કરાયેલી આ 'બટર ચિકન સ્ટફ્ડ ઈડલી'ની તસવીર જ્યારે X (ટ્વિટર) પર @yougotvansh નામના યુઝરે શેર કરી, ત્યારથી નેટજગતમાં કલ્પના બહારનો હંગામો મચી ગયો છે.

અત્યંત નરમ અને સાંભાર-ચટણી સાથે ખાવામાં આવતી પરંપરાગત ઈડલી સાથેના આ છેડછાડભર્યા પ્રયોગથી લોકો એવા ગુસ્સે ભરાયા છે કે જાતજાતની કટાક્ષપૂર્ણ પ્રતિક્રિયાઓ આપી રહ્યા છે. એક યુઝરે આ વાનગી પર આક્રોશ વ્યક્ત કરતા સ્વિશને ટેગ કરીને મજાકમાં લખ્યું કે, "આવું કરવા બદલ બનાવનારને ઓછામાં ઓછી ૨૦ વર્ષની જેલ થવી જોઈએ!" તો બીજા એક યુઝરે આકરા પાણીએ થતાં કહી દીધું કે, "ઈંડા ઢોસા બાદ હવે ઈડલીનો શિકાર કરાયો છે, આ ગુના માટે તો સીધી ગોળી જ મારી દેવી જોઈએ." મોટાભાગના પરંપરાગત ખોરાકના શોખીનોએ સ્પષ્ટ આક્રોશ વ્યક્ત કર્યો છે કે ઓરિજિનલ ફૂડના ઓરિજિનલ સ્વાદ સાથે આવા અસહ્ય પ્રયોગો બંધ થવા જોઈએ.

જોકે, આ ડિજિટલ યુદ્ધમાં બધા લોકો એકતરફી નહોતા. કેટલાક પ્રયોગપ્રિય યુઝર્સે આ વાનગીનો બચાવ પણ કર્યો હતો અને તેની સરખામણી ચાઇનીઝ 'ચિકન બાઓ બન' (Bao Bun) સાથે કરી હતી. એક યુઝરે તો એવો પણ દાવો કર્યો કે તેણે આ વાનગી ઓર્ડર કરીને ચાખી છે અને તેનો સ્વાદ ખરેખર અદ્ભુત છે! ગમે તેમ હોય, પણ ઉત્તર અને દક્ષિણ ભારતના આ બે સાવ અલગ સ્વાદોના મિશ્રણે સોશિયલ મીડિયા પર વાદ-વિવાદની મોટી આગ ચાંપી દીધી છે. હવે આ વાનગી હિટ જશે કે ફ્લોપ, એ તો ટેસ્ટ કરનારા જ નક્કી કરશે, પરંતુ હાલમાં તો આ ફ્યુઝન વાનગીએ ઈન્ટરનેટ પર જોરદાર ધૂમ મચાવી દીધી છે.