ઓટાવા : કેનેડામાં અભ્યાસ કરતા ભારતીય વિદ્યાર્થીઓ અને કામચલાઉ વિદેશી કામદારો માટે ઈમિગ્રેશન, રેફ્યુજીસ એન્ડ સિટીઝનશિપ કેનેડા (IRCC) દ્વારા એક મહત્વપૂર્ણ અને આકરી માર્ગદર્શિકા જારી કરવામાં આવી છે. IRCC એ સ્પષ્ટ શબ્દોમાં ચેતવણી આપી છે કે યોગ્ય અધિકૃતતા વગર કામ કરવાથી ગંભીર ઈમિગ્રેશન પરિણામો આવી શકે છે. નિયમોનું ઉલ્લંઘન કરનારાઓને દેશમાંથી બહાર કાઢવા (ડિપોર્ટેશન) ઉપરાંત કેનેડામાં પ્રવેશ પર ૫ વર્ષનો કાયમી પ્રતિબંધ અને ફ્રોડનો રેકોર્ડ નોંધાઈ શકે છે.

વિઝિટર વિઝા પર કામ કરવા પર પૂર્ણ પ્રતિબંધ

IRCC ની સ્પષ્ટતા અનુસાર, વિઝિટર વિઝા કે ઈલેક્ટ્રોનિક ટ્રાવેલ ઓથોરાઈઝેશન (eTA) ધરાવતા મુલાકાતીઓને કેનેડામાં કામ કરવાનો કોઈ અધિકાર મળતો નથી. ઉપરાંત, મુલાકાતીઓ કેનેડાની અંદરથી વર્ક પરમિટ માટે અરજી કરી શકતા નથી.

સરકારે ઈમિગ્રેશન ફ્રોડના લક્ષણો પ્રત્યે પણ ચેતવણી આપી છે. નોકરીની ઓફર કે વર્ક પરમિટના બદલામાં પૈસા માંગવા, સોશિયલ મીડિયા પર ગેરંટી સાથે પીઆર (PR) આપવાના વચનો આપવા કે કામના બદલામાં મફત રહેવાની ઓફર કરવી એ ફ્રોડના સંકેત છે.

"કામદારોએ પોતાની વર્ક પરમિટ પર ઉલ્લેખિત શરતો જેવી કે ચોક્કસ એમ્પ્લોયર, વ્યવસાય અને કાર્યસ્થળના નિયમોનું કડક પાલન કરવું પડશે. જો પરમિટ લંબાવવી હોય તો તે સમાપ્ત થાય તેના ઓછામાં ઓછા ૩૦ દિવસ પહેલાં અરજી કરવી જરૂરી છે."

— IRCC ની અધિકૃત માર્ગદર્શિકા

આંતરરાષ્ટ્રીય વિદ્યાર્થીઓ માટે કડક કલાકોના નિયમો

કેનેડામાં અભ્યાસ કરતા ભારતીય વિદ્યાર્થીઓ માટે IRCC એ સ્પષ્ટ કર્યું છે કે તેઓ ત્યારે જ કામ કરી શકે છે જો તેમની સ્ટડી પરમિટ પર કેમ્પસમાં કે કેમ્પસ બહાર કામ કરવાની મંજૂરી આપતી સ્પષ્ટ શરત હોય. કેમ્પસ બહાર નિર્ધારિત કલાકો કરતાં વધુ સમય કામ કરવાથી વિદ્યાર્થીનો દરજ્જો રદ થઈ શકે છે અને ભવિષ્યની પોસ્ટ-ગ્રેજ્યુએશન વર્ક પરમિટ (PGWP) પર પણ પાણી ફરી વળી શકે છે.

બીજી તરફ, કેનેડિયન શ્રમ કાયદા હેઠળ વિદેશી કામદારોને સુરક્ષા પણ આપવામાં આવી છે. એમ્પ્લોયર કોઈ પણ સંજોગોમાં કામદારોના પાસપોર્ટ કે વર્ક પરમિટ જપ્ત કરી શકશે નહીં અને તેમણે વ્યાજબી વેતન ચૂકવવું પડશે. જો એમ્પ્લોયર શોષણ કરે તો કામદારો પ્રાંતીય શ્રમ અધિકારીઓનો સીધો સંપર્ક કરી શકે છે.