નવી દિલ્હી, તા. 17: કોંગ્રેસના વરિષ્ઠ નેતા પવન ખેરાને સુપ્રીમ કોર્ટ તરફથી મોટો કાનૂની ઝટકો લાગ્યો છે. શુક્રવારે સુપ્રીમ કોર્ટે તેમની અરજી ફગાવી દેતા સ્પષ્ટ કર્યું છે કે તેમને હવે રાહત માટે આસામની સંબંધિત કોર્ટનો જ સંપર્ક કરવો પડશે. તેલંગાણા હાઈકોર્ટ દ્વારા આપવામાં આવેલા ટ્રાન્ઝિટ જામીન પરનો સ્ટે હટાવવાનો કોર્ટે ઇનકાર કરી દીધો છે, જેના કારણે હવે ખેરા પર ધરપકડની તલવાર લટકી રહી છે.
શું છે સમગ્ર વિવાદ?
આ વિવાદ આસામના મુખ્યમંત્રી હિમંત બિસ્વા શર્માની પત્ની રિંકી ભૂયાન શર્મા દ્વારા નોંધાવવામાં આવેલી FIR સાથે જોડાયેલો છે. પવન ખેરા પર આક્ષેપ છે કે તેમણે દાવો કર્યો હતો કે તેમની પાસે એક કરતાં વધુ દેશોના પાસપોર્ટ છે. આ મામલે આસામ પોલીસે છેતરપિંડી અને ગુનાહિત કાવતરા જેવી ગંભીર કલમો હેઠળ ગુનો દાખલ કર્યો છે.
દસ્તાવેજોમાં છેડછાડ પર કોર્ટની નારાજગી
સુનાવણી દરમિયાન સોલિસિટર જનરલે એક ચોંકાવનારો ઘટસ્ફોટ કર્યો હતો. તેમણે કોર્ટને જણાવ્યું કે પવન ખેરાએ તેલંગાણા હાઈકોર્ટમાં અધિકારક્ષેત્ર સાબિત કરવા માટે શંકાસ્પદ દસ્તાવેજો રજૂ કર્યા હતા. એવો આક્ષેપ છે કે આધાર કાર્ડના વિવિધ ભાગોને જોડીને એક નવો જ દસ્તાવેજ ઉભો કરવામાં આવ્યો હતો. જસ્ટિસ જેકે મહેશ્વરી અને જસ્ટિસ અતુલ એસ ચાંદુરકરની બેન્ચે આ બાબતને ગંભીર ગણાવીને પોતાની સખત નારાજગી વ્યક્ત કરી હતી.
બચાવ પક્ષની દલીલ
પવન ખેરા તરફથી હાજર રહેલા વરિષ્ઠ ધારાશાસ્ત્રી અભિષેક મનુ સિંઘવીએ દલીલ કરી હતી કે આ કોઈ કાવતરું નહોતું પરંતુ ઉતાવળમાં થયેલી એક "ટેકનિકલ ભૂલ" હતી, જે પાછળથી સુધારી લેવામાં આવી હતી. જોકે, કોર્ટે આ દલીલને માન્ય રાખી નહોતી અને જામીન લંબાવવાનો ઈનકાર કરી દીધો હતો.
હવે આગળ શું?
સુપ્રીમ કોર્ટના આ નિર્ણય બાદ પવન ખેરા પાસે હવે મર્યાદિત વિકલ્પો બચ્યા છે. તેમણે કાં તો આસામની કોર્ટમાં આત્મસમર્પણ કરવું પડશે અથવા ત્યાં નવી આગોતરા જામીન અરજી દાખલ કરવી પડશે. આસામ પોલીસ આ કેસમાં પહેલાથી જ દિલ્હી અને હૈદરાબાદમાં દરોડા પાડી ચુકી છે અને હવે તેમની ધરપકડ માટેની કાર્યવાહી ઝડપી બની શકે છે. કોર્ટે એમ પણ ઉમેર્યું હતું કે તેમની આ ટિપ્પણીઓની અસર કેસના મેરિટ પર નહીં પડે અને આસામની કોર્ટ સ્વતંત્ર રીતે નિર્ણય લઈ શકશે.