તા. ૨૧ ઓગષ્ટ ર૦ર૬ વિક્રમ સંવત ર૦૮૨ શ્રાવણ સુદ – ૯ શુક્રવાર
News of Wednesday, 18th November 2026
પાંચ વર્ષ પહેલાં નોકરી છોડવા છતાં ગ્રેચ્યુઇટી મેળવવાનો માર્ગ મોકળો: કર્ણાટક હાઈકોર્ટના સીમાચિહ્નરૂપ ચુકાદાથી કર્મચારીઓમાં ખુશી
અદાલતે સ્પષ્ટ કર્યું છે કે ગ્રેચ્યુઇટી માટે માત્ર કેલેન્ડરના પાંચ વર્ષ નહીં, પરંતુ કામ કરેલા વાસ્તવિક દિવસો અને સતત સેવાની કાનૂની જોગવાઈઓ જ મહત્વપૂર્ણ છે.

બેંગલુરુ : કર્ણાટક હાઈકોર્ટે ગ્રેચ્યુઇટીના નિયમો અંગે એક અત્યંત મહત્વપૂર્ણ અને સીમાચિહ્નરૂપ ચુકાદો આપતા જણાવ્યું છે કે જો કોઈ કર્મચારી પાંચ વર્ષ પૂરા કરવામાં થોડા મહિના કે દિવસો ઓછા પડે છતાં જરૂરી કાનૂની શરતો પૂરી કરતો હોય, તો તે ગ્રેચ્યુઇટી મેળવવા માટે હકદાર છે.
આ કેસની વિગતો મુજબ, બેંગલુરુ મેટ્રોના એક ભૂતપૂર્વ સહાયક ઇજનેરે ૪ વર્ષ, ૯ મહિના અને ૧૨ દિવસ સેવા આપીને રાજીનામું આપ્યું હતું, પરંતુ કંપનીએ પાંચ વર્ષ પૂરા ન થયાનું કારણ આપીને રૂ. ૧.૭૫ લાખની ગ્રેચ્યુઇટી આપવાનો ઇનકાર કર્યો હતો, જેની સામે કર્મચારીએ કાનૂની લડત શરૂ કરી હતી.
આ મામલાની સુનાવણી કરતા હાઈકોર્ટની ડિવિઝન બેન્ચે ચુકાદો આપ્યો હતો કે ગ્રેચ્યુઇટીની પાત્રતા માત્ર જોડાવા અને છૂટવાની તારીખના આધારે નક્કી ન થવી જોઈએ, પરંતુ કર્મચારીએ પાંચમા વર્ષ દરમિયાન કેટલા દિવસ વાસ્તવિક કામ કર્યું છે તેની ગણતરી થવી અનિવાર્ય છે.
અદાલતે બેંગલુરુ મેટ્રો તંત્રને આદેશ આપ્યો હતો કે તે સંબંધિત કર્મચારીને ૧.૭૫ લાખ રૂપિયાની ગ્રેચ્યુઇટીની રકમ ૧૦ ટકા વાર્ષિક વ્યાજ સાથે ચૂકવે, જેથી દેશભરના લાખો કર્મચારીઓ માટે એક મોટો ન્યાયિક આધાર ઊભો થયો છે.
કાયદાકીય જોગવાઈઓ અનુસાર, જો કોઈ કર્મચારી છ દિવસ કામ કરતા હોય અને વર્ષમાં ૨૪૦ દિવસ અથવા પાંચ દિવસ કામ કરતા હોય તો ૧૯૦ દિવસથી વધુ કામ કરે, તો તેને સતત સેવાના એક વર્ષ તરીકે ગણવામાં આવે છે, જે પાંચ વર્ષની શરતમાં રાહત આપે છે.
આ ચુકાદાથી એવા તમામ ખાનગી અને સરકારી કર્મચારીઓને મોટી રાહત મળશે જેઓ અનિવાર્ય સંજોગોને કારણે પાંચ વર્ષ પૂર્ણ થયા પહેલા નોકરી છોડી દે છે, અને હવે તેઓ પોતાના વાસ્તવિક કામના દિવસોના આધારે ગ્રેચ્યુઇટીનો દાવો કરી શકશે.
(8:05 PM IST)









છેલ્લા 8 દિવસમાં સૌથી લોકપ્રિય 
