મુંબઈ : મુંબઈની જીવાદોરી સમાન લોકલ ટ્રેનોમાં દૈનિક મુસાફરી કરતા લાખો પ્રવાસીઓની સમસ્યાઓ અને અપેક્ષાઓને વાચા આપવા માટે મધ્ય અને પશ્ચિમ રેલવે દ્વારા વિશેષ ‘રેલ જનસંવાદ’ કાર્યક્રમનું આયોજન કરવામાં આવ્યું હતું. છત્રપતિ શિવાજી મહારાજ ટર્મિનસ (CSMT) અને મુંબઈ સેન્ટ્રલ સ્ટેશન ખાતે યોજાયેલા આ કાર્યક્રમમાં મુંબઈગરાઓએ રેલવે વહીવટી તંત્ર સમક્ષ પોતાની મુશ્કેલીઓ ખુલીને રજૂ કરી હતી. ખાસ કરીને એસી લોકલ ટ્રેનના વધેલા ભાડામાં ઘટાડો કરવા અને વધતી ભીડ વચ્ચે મહિલાઓની સુરક્ષા માટે ટ્રેનોમાં મહિલા ડબ્બાની સંખ્યા વધારવાની પ્રબળ માંગ પ્રવાસીઓ દ્વારા કરવામાં આવી હતી.

મધ્ય રેલવેના મહાવ્યવસ્થાપક રાજીવ શ્રીવાસ્તવ અને પશ્ચિમ રેલવેના મહાવ્યવસ્થાપક રામાશ્રય પાંડે સહિતના ઉચ્ચ અધિકારીઓની ઉપસ્થિતિમાં યોજાયેલી આ બેઠકમાં પ્રવાસીઓએ દૈનિક પ્રવાસ દરમિયાન પડતી અસહ્ય હાલાકીઓ વિશે ચર્ચા કરી હતી. મુસાફરોએ માંગ કરી હતી કે પીક અવર્સ દરમિયાન લોકલ ટ્રેનોમાં થતી ભારે ભીડને ધ્યાનમાં રાખીને મહિલાઓ, વરિષ્ઠ નાગરિકો અને બાળકો માટે વધુ સુવિધાઓ ઊભી કરવામાં આવે. આ ઉપરાંત, દિવ્યાંગો માટે અનામત રાખવામાં આવેલા ડબ્બાઓમાં અનધિકૃત મુસાફરોની ઘૂસણખોરી રોકવા માટે કડક પગલાં લેવામાં આવે તેમજ સ્ટેશનો પર પીવાના ઠંડા પાણી અને સ્વચ્છતાની પાયાની સુવિધાઓ વધુ મજબૂત બનાવવામાં આવે તેવી રજૂઆતો પણ કરવામાં આવી હતી.

રેલવે તંત્ર તરફથી પ્રવાસીઓને ખાતરી આપવામાં આવી છે કે તેમની તમામ રજૂઆતો અને સૂચનોને ટૂંકા, મધ્યમ અને લાંબા ગાળાના એમ ત્રણ હિસ્સામાં વહેંચીને તેની સમીક્ષા કરવામાં આવશે. મુંબઈ સબર્બન રેલવેમાં રોજની ૩,૩00 થી વધુ લોકલ ટ્રેનો દોડતી હોવા છતાં અને ૭૦ લાખથી વધુ મુસાફરો પ્રવાસ કરતા હોવાને કારણે પ્રવાસીઓની સગવડ અને સલામતી હંમેશા રેલવેની પ્રાથમિકતા રહી છે. કાર્યક્રમ દરમિયાન 'બદલાતી રેલ, નવા ભારતની ઓળખ' વિષય પર પથનાટક પણ રજૂ કરવામાં આવ્યું હતું, પરંતુ પ્રવાસીઓની આ માંગણીઓ ક્યારે વાસ્તવિક સ્વરૂપ ધારણ કરશે તેની કોઈ ચોક્કસ સમયમર્યાદા હજુ જાહેર કરવામાં આવી નથી.