શ્રીનગર: જમ્મુ કાશ્મીરને ફરીથી રાજ્યનો દરજ્જો આપવાની માંગના સમર્થનમાં નેશનલ કોન્ફરન્સ દ્વારા ૨૦ જુલાઈએ સંસદ સત્રના પહેલા દિવસે દિલ્હીમાં ધરણા પ્રદર્શન કરવામાં આવશે. પ્રદેશ ભાજપે આ પ્રદર્શનમાં ભાગ લેવાનો ઇનકાર કરી દીધો છે. ભાજપના મતે આ માત્ર એક નાટક છે જ્યારે નેશનલ કોન્ફરન્સ અને અન્ય પક્ષોનું કહેવું છે કે આ પ્રદેશની જનતાના હકની માંગ છે.
નેશનલ કોન્ફરન્સને વિપક્ષી દળોના સમર્થનની અપેક્ષા છે પરંતુ ભાજપે તેને આંખમાં ધૂળ નાખવા સમાન ગણાવીને તેમાં ભાગ ન લેવાની જાહેરાત કરી છે. જમ્મુ કાશ્મીર ભાજપના નેતા સુનીલ શર્માએ આને ભ્રષ્ટાચાર જેવા મુદ્દાઓ પરથી ધ્યાન હટાવવાનો પ્રયાસ ગણાવ્યો છે. આપની પાર્ટીના અલ્તાફ બુખારીએ પણ રાજ્યનો દરજ્જો ન મળવાને કારણે વિકાસ અટકી ગયો હોવાની ટીકા કરી છે પરંતુ પ્રદર્શનમાં સામેલ થવાની ના પાડી દીધી છે.
જોકે ભારતીય જનતા પાર્ટી સતત કહેતી આવી છે કે જમ્મુ કાશ્મીરને યોગ્ય સમયે રાજ્યનો દરજ્જો પરત કરવામાં આવશે. કેન્દ્ર સરકાર પણ સુપ્રીમ કોર્ટમાં ખાતરી આપી ચૂકી છે કે રાજ્યનો દરજ્જો પુનઃસ્થાપિત કરવો એ તેમની પ્રતિબદ્ધતા છે પરંતુ કોઈ ચોક્કસ સમયમર્યાદા જાહેર કરવામાં આવી નથી. આ જ કારણે વિપક્ષી દળો સરકાર પર પ્રક્રિયામાં બિનજરૂરી વિલંબનો આરોપ લગાવી રહ્યા છે.
નેશનલ કોન્ફરન્સના નેતાઓનું કહેવું છે કે વર્ષ ૨૦૧૯ માં જમ્મુ કાશ્મીરનો રાજ્યનો દરજ્જો નાબૂદ કરવામાં આવ્યા પછી જનતા લોકશાહી અધિકારોની સંપૂર્ણ બહાલીની રાહ જોઈ રહી છે. હવે આ મુદ્દાને સંસદની અંદર અને બહાર બંને જગ્યાએ મજબૂતીથી ઉઠાવવામાં આવશે. પાર્ટી સૂત્રોના જણાવ્યા અનુસાર નેશનલ કોન્ફરન્સના સાંસદો અને વરિષ્ઠ નેતાઓ સંસદ સંકુલ પાસે શાંતિપૂર્ણ ધરણા કરશે. આ દરમિયાન કેન્દ્ર સરકાર પાસે જમ્મુ કાશ્મીરને ઝડપથી પૂર્ણ રાજ્યનો દરજ્જો આપવા, ચૂંટાયેલી સરકારના અધિકારો સ્પષ્ટ કરવા તથા કેન્દ્ર શાસિત પ્રદેશની વ્યવસ્થા સમાપ્ત કરવાની માંગ કરવામાં આવશે