પનવેલ : મહારાષ્ટ્રની અસ્મિતા અને શ્રદ્ધાના પ્રતિકસમા મહાપર્વ ગણેશોત્સવને વૈશ્વિક સ્તરે યુનેસ્કો (UNESCO) ના અમૂર્ત સાંસ્કૃતિક વારસાની માન્યતા અપાવવા માટે રાજ્ય સરકાર દ્વારા એક ભવ્ય અભિયાન શરૂ કરવામાં આવ્યું છે. આ અભિયાન અંતર્ગત પનવેલના નાગરિકો, હાઉસિંગ સોસાયટીઓ અને જાહેર ગણેશ મંડળોને ઉત્સાહભેર જોડાવા અને પોતાની પરંપરાગત ઉજવણીઓનું દસ્તાવેજીકરણ કરવા વિશેષ આહ્વાન કરવામાં આવ્યું છે. પનવેલ મ્યુનિસિપલ કોર્પોરેશનના મેયર નીતિન પાટિલ અને મ્યુનિસિપલ કમિશનર મંગેશ ચિતાલે નાગરિકોને અપીલ કરી છે કે તેઓ ગણેશોત્સવ સાથે જોડાયેલી પોતાની કૌટુંબિક પરંપરાઓ અને ઐતિહાસિક વાર્ષિક પ્રથાઓને ડિજિટલ પ્લેટફોર્મ પર નોંધાવે.

આ દસ્તાવેજીકરણ ઝુંબેશનો મુખ્ય ઉદ્દેશ્ય મહારાષ્ટ્રની સમૃદ્ધ સામાજિક, સાંસ્કૃતિક અને કલાત્મક વિરાસતને વિશ્વ સમક્ષ રજૂ કરવાનો છે. આ અભિયાનમાં ભાગ લેવા માટે નાગરિકો ખૂબ જ સરળતાથી જોડાઈ શકે છે. રહેવાસીઓ ગણેશોત્સવ સાથે જોડાયેલી ધાર્મિક વિધિઓ, કલાત્મક સજાવટ, પરંપરાગત વાનગીઓ, ફોટોગ્રાફ્સ અને વિડિયોઝ સત્તાવાર વેબસાઇટ Bappa.org ની મુલાકાત લઈને, ઝુંબેશ બેનરના QR કોડ દ્વારા અથવા WhatsApp નંબર 9136172681 પર 'Hi' મોકલીને અપલોડ કરી શકે છે. રાજ્ય સરકાર આ અનોખી પહેલમાં સહભાગી થનાર દરેક નાગરિકને પ્રોત્સાહિત કરવા માટે 'ડિજિટલ કલ્ચરલ પ્રિઝર્વર સર્ટિફિકેટ' પણ એનાયત કરશે.

ગણેશોત્સવ માત્ર ધાર્મિક નહીં, સામાજિક ઉત્સવ છે

પનવેલ મ્યુનિસિપલ કોર્પોરેશને તમામ સામાજિક સંસ્થાઓ અને નાગરિકોને મોટી સંખ્યામાં આગળ આવવા અનુરોધ કર્યો છે. આ ઝુંબેશ માત્ર એક ધાર્મિક તહેવાર પૂરતી મર્યાદિત નથી, પરંતુ તે સમુદાયની ભાગીદારી, કલા, સંગીત, પરંપરાગત ખોરાક અને પેઢીઓથી ચાલી આવતી સાંસ્કૃતિક પ્રથાઓનો અદ્ભુત સમન્વય છે. પનવેલના લોકો આ ઝુંબેશમાં જોડાઈને મહારાષ્ટ્રની ગૌરવશાળી પરંપરાને યુનેસ્કોના નકશા પર સ્થાન અપાવવામાં પોતાનું અમૂલ્ય યોગદાન આપી રહ્યા છે.