દુબઈ : પાકિસ્તાનના યુવા ક્રિકેટ સ્ટાર હમઝા જહૂરે ભારત સામે રમાયેલા અંડર ૧૯ એશિયા કપના અત્યંત રોમાંચક મુકાબલામાં પોતાની કમાલની બેટિંગના જોરે હારના મોઢામાંથી વિજય ખેંચી લીધો હતો. આ હાઇ વોલ્ટેજ મેચમાં પાકિસ્તાને ભારતને ત્રણ વિકેટે હરાવીને શાનદાર વિજય મેળવ્યો હતો, પરંતુ મેચ બાદ હમઝા જહૂરે જે પ્રકારે ઉજવણી કરી તેણે તમામનું ધ્યાન પોતાના તરફ ખેંચી લીધું હતું. મેચનો વિજેતા શોટ ફટકાર્યા બાદ આ યુવા ખેલાડીએ પોતાના ખિસ્સામાંથી હાથથી લખેલી એક નોટ કાઢીને દર્શકોને બતાવી, જેમાં તેની અગાઉની ભવિષ્યવાણી સ્પષ્ટ રીતે લખેલી હતી.

ભારતે પ્રથમ બેટિંગ કરતા અર્જુન રાજપૂતની આક્રમક સદીના સહારે ૨૦૯ રનનો સન્માનજનક સ્કોર બનાવ્યો હતો. જવાબમાં લક્ષ્યનો પીછો કરવા ઉતરેલી પાકિસ્તાનની શરૂઆત ખરાબ રહી હતી અને ટીમ મુશ્કેલીમાં મુકાઈ ગઈ હતી. તેવા સમયે વિકેટકીપર બેટ્સમેન હમઝા જહૂરે હસનૈન ડાર સાથે મળીને મોરચો સંભાળ્યો હતો. આ બંને ખેલાડીઓ વચ્ચે છઠ્ઠી વિકેટ માટે ૧૦૭ રનની અત્યંત મહત્વપૂર્ણ ભાગીદારી નોંધાઈ હતી, જેમાં હસનૈન ડારે ૩૮ રનનું યોગદાન આપ્યું હતું.

શરૂઆતમાં હમઝાએ તોફાની અંદાજમાં બેટિંગ કરીને પાકિસ્તાનની ઇનિંગને પાટા પર લાવી હતી, પરંતુ સાથી ખેલાડીઓની વિકેટો પડવા છતાં તેણે અદ્ભુત સંયમ દેખાડ્યો અને ટીમ જીતના લક્ષ્ય સુધી પહોંચે તેની ખાતરી કરી હતી. વિજયી ચોગ્ગો ફટકારતાની સાથે જ મેદાન પર ઉજવણી શરૂ થઈ ગઈ હતી. હમઝાએ હેલ્મેટ ઉતારીને પાકિસ્તાની સમર્થકો તરફ દોટ લગાવી હતી અને સહાડી ખેલાડીઓએ તેની સાથે ખુશી વ્યક્ત કરી હતી.

આ સમગ્ર મેચનો સૌથી મોટો રોમાંચક ક્ષણ તે હતી જ્યારે હમઝાએ પોતાના ખિસ્સામાંથી પેપર કાઢીને દર્શકો સમક્ષ લહેરાવ્યું. તે ચિઠ્ઠી પર લખેલું હતું કે આવતીકાલની મેચ પચાસ હમઝા જહૂર. આ યુવા ખેલાડીએ મેચ અગાઉ પચાસ રન બનાવવાનું લક્ષ્ય નક્કી કર્યું હતું, પરંતુ તેણે તેનાથી પણ એક પગલું આગળ વધીને શાનદાર સદી ફટકારી દીધી. તેની આ અનોખી સ્ટાઇલ અને શાનદાર રમત કાયમ માટે યાદગાર બની ગઈ છે.