ઇસ્લામાબાદ: આર્થિક કંગાળિયત બાદ હવે ગંભીર જળ સંકટનો સામનો કરી રહેલા પાકિસ્તાને ભારત સામે ફરી એકવાર પરમાણુ યુદ્ધની ગર્જના કરી છે. પાકિસ્તાનના સંરક્ષણ પ્રધાન ખ્વાજા આસિફે એક ટીવી ચેનલને આપેલી મુલાકાતમાં ખુલ્લી ધમકી આપી છે કે જો ભારત તરફથી પાકિસ્તાનની જળ સુરક્ષાને સહેજ પણ જોખમ ઊભું થશે, તો ઇસ્લામાબાદ ભારત સામે સૈન્ય કાર્યવાહી અને યુદ્ધ છેડતા અચકાશે નહીં. સંરક્ષણ પ્રધાને દાવો કર્યો હતો કે જો નવી દિલ્હી પાકિસ્તાન તરફ આવતા પાણીના પ્રવાહને રોકવા માટે "ખતરનાક ગતિ"થી આગળ વધશે, તો પાકિસ્તાન પાસે યુદ્ધ સિવાય બીજો કોઈ વિકલ્પ બચશે નહીં.

બંને દેશો વચ્ચેનો આ નવો જળ-વિવાદ જમ્મુ-કાશ્મીરના પહલગામમાં થયેલા ઘાતક આતંકવાદી હુમલા બાદ શરૂ થયો છે, જેમાં ૨૬ લોકોના મોત થયા હતા. આ કાયરતાપૂર્ણ હુમલાના આકરા જવાબમાં ભારતે વિશ્વ બેંકની મધ્યસ્થી વાળી ૧૯૬૦ની 'સિંધુ જળ સંધિ'ને તાત્કાલિક અસરથી સ્થગિત કરી દીધી હતી. ભારતના જળ શક્તિ મંત્રી સી.આર. પાટીલે સ્પષ્ટ કર્યું હતું કે જ્યાં સુધી પાકિસ્તાન સરહદ પારથી આતંકવાદને ભંડોળ પૂરું પાડવાનું બંધ નહીં કરે, ત્યાં સુધી આ પ્રતિબંધ ચાલુ રહેશે. ભારત જૂન ૨૦૨૮ સુધીમાં પાકિસ્તાન તરફ જતો સિંધુ નદીનો પાણી પુરવઠો સંપૂર્ણપણે કાપી શકે છે તેવી આશંકાથી પાકિસ્તાની શાસકો ફફડી ઉઠ્યા છે.

આ સંધિ હેઠળ પાકિસ્તાનને સિંધુ બેસિનનો આશરે ૮૦ ટકા હિસ્સો મળતો હતો, જે તેના દેશની ૮૦ ટકા ખેતીલાયક જમીનનો મુખ્ય આધાર છે. હાલમાં પાકિસ્તાનની એક તૃતીયાંશ વસ્તી, ખાસ કરીને સિંધ અને બલુચિસ્તાન પ્રાંતો, પાણીના ટીપે-ટીપા માટે તરસ્યા છે અને ત્યાં નહેરોમાં ૮૦ ટકાથી વધુની અછત નોંધાઈ છે. આ આંતરિક કટોકટી વચ્ચે પાકિસ્તાની રક્ષા મંત્રીએ ભારત પર ચિનાબ નદીના પ્રવાહમાં હેરફેર કરવાનો અને જળશાસ્ત્રીય ડેટા છુપાવીને પાણીને શસ્ત્ર તરીકે વાપરવાનો ગંભીર આરોપ લગાવ્યો છે, જેના કારણે દક્ષિણ એશિયાના આ બે પરમાણુ સંપન્ન પડોશીઓ વચ્ચે સરહદી તણાવ ચરમસીમાએ પહોંચી ગયો છે.