જમ્મુ: જમ્મુ-કાશ્મીરના પ્રખ્યાત પર્યટન સ્થળ પહેલગામમાં ગયા વર્ષે પ્રવાસીઓ પર થયેલા ભયાનક આતંકવાદી હુમલાના કેસમાં રાષ્ટ્રીય તપાસ એજન્સી (NIA) એ એક મોટો સપાટો બોલાવ્યો છે. NIA દ્વારા જમ્મુની વિશેષ અદાલતમાં લશ્કર-એ-તૈયબાના મુખ્ય વડા અને વૈશ્વિક આતંકવાદી હાફિઝ સઈદ વિરુદ્ધ એક મહત્વપૂર્ણ પૂરક ચાર્જશીટ દાખલ કરવામાં આવી છે. આ ચાર્જશીટમાં પહેલગામના બૈસરન મેદાનમાં ૨૫ પ્રવાસીઓ અને એક સ્થાનિક પોની ઓપરેટરની ઘાતકી હત્યા પાછળ પાકિસ્તાનની સીધી અને સક્રિય ભૂમિકા હોવાના ચોંકાવનારા વૈજ્ઞાનિક પુરાવા રજૂ કરવામાં આવ્યા છે, જેના કારણે બંને દેશો વચ્ચે ચાર દિવસ સુધી યુદ્ધ જેવી ગંભીર સ્થિતિ સર્જાઈ હતી.

કેન્દ્રીય આતંકવાદ વિરોધી એજન્સીએ સ્પષ્ટ કર્યું છે કે આ લોહિયાળ કાવતરામાં હાફિઝ સઈદની વ્યક્તિગત ક્ષમતા ઉપરાંત લશ્કરના ફ્રન્ટ ઓર્ગેનાઇઝેશન 'ધ રેઝિસ્ટન્સ ફ્રન્ટ' (TRF) નો હાથ હતો. અગાઉ ૧૫ ડિસેમ્બરે દાખલ કરાયેલી ૧,૫૯૭ પાનાની મૂળ ચાર્જશીટના અનુસંધાનમાં જ આ નવી કાનૂની કાર્યવાહી કરવામાં આવી છે. તપાસ એજન્સીએ હાફિઝ સઈદ વિરુદ્ધ ભારતીય દંડ સંહિતા  અને ગેરકાયદેસર પ્રવૃત્તિઓ નિવારણ અધિનિયમ (UAPA) ની કડક આતંકવાદ વિરોધી કલમો હેઠળ ભારત સામે યુદ્ધ છેડવા અને આંતરરાષ્ટ્રીય સ્તરે ગુનાહિત કાવતરું ઘડવાનો ગુનો નોંધ્યો છે.

આ હુમલામાં સામેલ આતંકવાદીઓના નેટવર્કનો પર્દાફાશ કરતા NIAએ અગાઉ જ ત્રણ પાકિસ્તાની આતંકીઓ ફૈઝલ જટ્ટ ઉર્ફે સુલેમાન, હબીબ તાહિર ઉર્ફે જિબ્રાન ભાઈ અને હમઝા અફઘાનીની ઓળખ કરી હતી. આ પૈકીનો મુખ્ય આતંકી હમઝા અફઘાની જુલાઈ ૨૦૨૫ દરમિયાન ભારતીય સુરક્ષા દળોના ભવ્ય "ઓપરેશન મહાદેવ" માં ઠાર મરાયો હતો. આ ઉપરાંત, સ્થાનિક સ્તરે આતંકીઓને મદદ કરનારા ઓવર ગ્રાઉન્ડ વર્કર્સ બશીર અહેમદ અને પરવેઝ અહેમદ તેમજ ટીઆરએફ હેન્ડલર સાજિદ સૈફુલ્લાહ જટ્ટ ઉર્ફે લંગડાને પણ આરોપી બનાવવામાં આવ્યા છે, અને સરહદ પારથી ઓપરેટ થતા આ આખા મોડ્યુલના મૂળિયાં ઉખેડી નાખવા માટે તપાસ હજુ પણ તેજ ગતિએ ચાલી રહી છે.