સૂર્યપેટ : તેલંગાણાના સૂર્યપેટ જિલ્લામાંથી એક અત્યંત હૃદયદ્રાવક અને ચોંકાવનારા સમાચાર સામે આવ્યા છે. રવિવારે સવારે હૈદરાબાદના ખ્યાતનામ ન્યુરોસર્જન ડૉ. કસાકુર્તી જગદીશ પોતાની જ ગતિશીલ વોલ્વો કારમાં જીવતા બળી ગયા હતા, જ્યારે તેમની કાર અચાનક બેકાબૂ થઈને રોડ વચ્ચેના ડિવાઇડર સાથે ધડાકાભેર અથડાઈ હતી.

પ્રાપ્ત વિગતો અનુસાર, આ ભયાનક અકસ્માત રવિવારે સવારે આશરે 7:15 વાગ્યે ખમ્મમ-હૈદરાબાદ હાઇવે પર આવેલા સૂર્યપેટના પિલ્લામારી નજીક ઘટ્યો હતો. ડૉક્ટરની હાઈ-સ્પીડ વોલ્વો કાર અચાનક જ ડ્રાઇવરનો કાબૂ ગુમાવી બેસી હતી અને સીધી રોડની રેલિંગ તથા ડિવાઇડર સાથે જઈને અથડાઈ હતી, જેના કારણે વાહનમાં ગંભીર નુકસાન થયું હતું.

ટક્કર એટલી હદે પ્રચંડ અને શક્તિશાળી હતી કે અથડાતાની સાથે જ કારમાં અચાનક આગ ભભૂકી ઉઠી હતી. જોતજોતામાં આગે વિકરાળ સ્વરૂપ ધારણ કરી લીધું અને આખી વોલ્વો કારને લપેટમાં લઈ લીધી હતી, જેના પરિણામે અંદર ફસાયેલા ડૉક્ટરને બહાર નીકળવાની તક પણ મળી શકી ન હતી.

ઘટનાની જાણ થતાં જ હાઈવે પરથી પસાર થઈ રહેલા રાહદારીઓએ તાત્કાલિક સ્થાનિક પોલીસને ફોન કરીને જાણ કરી હતી. ફાયર બ્રિગેડની ગાડીઓએ તાત્કાલિક ઘટનાસ્થળે દોડી આવી ભારે જહેમત બાદ આગ પર કાબૂ મેળવ્યો હતો, પરંતુ કમનસીબે તે સમય સુધીમાં કાર સંપૂર્ણપણે બળીને ખાખ થઈ ચૂકી હતી અને તબીબનું ગૂંગળામણ તથા ગંભીર દાઝી જવાને કારણે મૃત્યુ નીપજ્યું હતું.