મુંબઈ: મીરા રોડના નયા નગર વિસ્તારમાં વહેલી સવારે એક ચોંકાવનારી ઘટનામાં એક કટ્ટરપંથી યુવાને બે સિક્યોરિટી ગાર્ડ પાસે કલમા પઢવાની માંગ કરી હતી અને ઇનકાર કરવા પર તેમના પર છરી વડે ઘાતકી હુમલો કર્યો હતો. પોલીસે ગણતરીના કલાકોમાં જ આરોપીની ધરપકડ કરી લીધી છે અને તેના ઘરમાંથી આતંકી સંગઠનો સાથે જોડાયેલું શંકાસ્પદ સાહિત્ય મળી આવતા આ કેસની તપાસ હવે આતંકવાદ વિરોધી દળ (એટીએસ) દ્વારા સઘન રીતે શરૂ કરવામાં આવી છે.

 

  આરોપી જુબેર અંસારીએ ફરજ પરના ગાર્ડ રાજકુમાર મિશ્રા અને સુબ્રતો રમેશ સેન પાસે પહેલા મસ્જિદનો રસ્તો પૂછ્યો હતો.

 

  થોડીવાર પછી પરત ફરીને તેણે એક ગાર્ડને તેનો ધર્મ પૂછ્યો અને ત્યારબાદ છરી વડે હુમલો કર્યો.

  ત્યારબાદ તે કેબિનમાં ઘૂસ્યો અને બીજા ગાર્ડને કલમા પઢવાનું કહ્યું, ગાર્ડે તેમ ન કરતા તેના પર પણ છરીના ઘા ઝીંકી જીવલેણ હુમલો કર્યો.

  બંને ઘાયલ ગાર્ડ હાલ હોસ્પિટલમાં સારવાર હેઠળ છે અને તેમની સ્થિતિ સ્થિર છે.

 

 કોણ છે આરોપી જુબેર અંસારી?

 

• ૩૧ વર્ષનો આરોપી જુબેર વિજ્ઞાનનો સ્નાતક છે અને ઘણા વર્ષો સુધી અમેરિકામાં રહ્યો છે.

• વિદેશમાં સારી નોકરી ન મળતા તે ભારત પરત ફર્યો હતો અને મીરા રોડમાં એકલો રહી ઓનલાઈન કેમિસ્ટ્રીના ક્લાસ ચલાવતો હતો.

• તેના ઘરેથી આતંકી સંગઠનો સાથે જોડાવાની ઈચ્છા વ્યક્ત કરતી હાથથી લખેલી ચિઠ્ઠીઓ મળી આવી છે.

 

 સમગ્ર ઘટના :

મુંબઈ સહિત દેશભરના મીડિયા અને સોશિયલ મીડિયા પ્લેટફોર્મ પર હાલમાં મીરા રોડની ઘટના ભારે ચર્ચામાં છે. ૨૭ એપ્રિલના રોજ વહેલી સવારે ૪ વાગ્યાની આસપાસ મીરા રોડ (પૂર્વ) ના નયા નગર વિસ્તારમાં બનેલી આ ઘટનાએ સુરક્ષા એજન્સીઓની ઊંઘ હરામ કરી દીધી છે. રાબેતા મુજબની એક ગુનાહિત ઘટના લાગતી આ બાબત હવે રાષ્ટ્રીય સુરક્ષાનો મોટો મુદ્દો બની ગઈ છે. આ હુમલાએ એક વર્ષ પહેલા કાશ્મીરની બૈસરન ખીણમાં થયેલા પહલગામ હત્યાકાંડની યાદ અપાવી દીધી છે, જ્યાં આતંકવાદીઓએ કલમા પઢવામાં નિષ્ફળ રહેલા અનેક હિન્દુઓની નિર્મમ હત્યા કરી હતી.

 

નયા નગર પોલીસે સીસીટીવી ફૂટેજના આધારે ગણતરીના કલાકોમાં જ આરોપી જુબેર અંસારીની ધરપકડ કરી લીધી હતી. તેને થાણેની કોર્ટમાં રજૂ કરવામાં આવતા કોર્ટે તેને ૪ મે સુધી પોલીસ કસ્ટડીમાં રિમાન્ડ પર મોકલી આપ્યો છે.

 

 આતંકી વિચારધારા અને એટીએસની સઘન તપાસ

પોલીસ તપાસ દરમિયાન આરોપી જુબેરના ઘરેથી કેટલીક શંકાસ્પદ હાથથી લખેલી નોટ્સ અને આતંકવાદી સંગઠનોને લગતું સાહિત્ય મળી આવ્યું છે. આ નોંધોમાં તેની આવા ચરમપંથી સંગઠનો સાથે જોડાવાની તીવ્ર ઈચ્છા સ્પષ્ટ દેખાય છે. પ્રાથમિક તપાસમાં એવું તારણ નીકળ્યું છે કે આ હુમલો કોઈ ચોક્કસ કટ્ટરપંથી વિચારધારાથી પ્રેરિત થઈને કરવામાં આવ્યો છે. આ ગંભીરતાને જોતા જ મહારાષ્ટ્ર સરકારે આ કેસની તપાસ તાત્કાલિક ધોરણે એટીએસને સોંપી દીધી છે.

 

ડાયરીમાંથી મળેલા કેટલાક અત્યંત સંવેદનશીલ સંદર્ભોનો પણ અભ્યાસ કરવામાં આવી રહ્યો છે જેથી આ ઘટના પાછળનો ચોક્કસ હેતુ અને તેનું સંપૂર્ણ નેટવર્ક ખુલ્લું પાડી શકાય.