નવી દિલ્હી, તા.૦૩: ઇન્દોરના જાણીતા ટ્રાન્સપોર્ટ ઉદ્યોગપતિ રાજા રઘુવંશીની હનીમૂન દરમિયાન થયેલી સનસનાટીભર્યા હત્યાના કેસમાં સુપ્રીમ કોર્ટના ચુકાદા બાદ પીડિત પરિવારનો ગુસ્સો અને આક્રોશ ફાટી નીકળ્યો છે. દેશની સર્વોચ્ચ અદાલતે મેઘાલય હાઈકોર્ટ દ્વારા મુખ્ય આરોપી પત્ની સોનમ રઘુવંશીને આપવામાં આવેલા જામીન પર સ્ટે (રોક) લગાવવાનો ઇનકાર કરી દીધો છે. સુપ્રીમ કોર્ટના આ નિર્ણય પર પ્રતિક્રિયા આપતા રાજા રઘુવંશીની લાચાર માતા અને ભાઈઓએ રડતી આંખે વડાપ્રધાન નરેન્દ્ર મોદી અને કેન્દ્ર સરકાર પાસે આ મામલાની સીબીઆઈ (CBI) તપાસ કરાવવાની ગુહાર લગાવી છે.
પીડિત રાજાની માતા ઉમા રઘુવંશીએ ધ્રુજતા અવાજે ન્યાયની ભીખ માંગતા કહ્યું કે, "હું દેશની સર્વોચ્ચ અદાલત અને મધ્યપ્રદેશના મુખ્યમંત્રી મોહન યાદવને હાથ જોડીને વિનંતી કરું છું કે મારા નિર્દોષ દીકરાના હત્યારાઓને જેલના સળિયા પાછળ ધકેલવામાં આવે. જો રાજાને ન્યાય નહીં મળે, તો સમાજમાં સોનમ જેવી છોકરીઓની હિંમત વધી જશે અને તેઓ આવા જઘન્ય ગુનાઓ આચરતી રહેશે." રાજાના મોટા ભાઈઓ સચિન અને વિપિન રઘુવંશીએ પણ સ્થાનિક પોલીસ તપાસમાં મોટી ખામીઓ હોવાનો આક્ષેપ કરીને ટૂંક સમયમાં જ સોનમના જામીન રદ થવાની આશા વ્યક્ત કરી છે.
સુપ્રીમ કોર્ટે હાઈકોર્ટના વલણ પર આશ્ચર્ય વ્યક્ત કર્યું
સુપ્રીમ કોર્ટના જસ્ટિસ એમ.એમ. સુંદરેશ અને જસ્ટિસ શીલ નાગુની બેન્ચે આ હાઈ-પ્રોફાઈલ કેસની સુનાવણી દરમિયાન મેઘાલય હાઈકોર્ટ દ્વારા સોનમને જામીન આપવાના આદેશ પર આશ્ચર્ય જરૂર વ્યક્ત કર્યું હતું, પરંતુ કાયદાકીય તકનીકી કારણોસર તેના પર તાત્કાલિક સ્ટે આપવાનો ઇનકાર કર્યો હતો. અદાલતે નોંધ્યું કે સોનમ હાલ જેલની બહાર આવી ચૂકી છે અને તે નીચલી કોર્ટની શરતોને આધીન શિલોંગમાં જ રહી રહી છે. કોર્ટે હવે આ કેસની વધુ સુનાવણી વેકેશન ખુલ્યા બાદ નિયત કરી છે.
સુનાવણી દરમિયાન મેઘાલય સરકાર વતી પેશ થયેલા સોલિસિટર જનરલ તુષાર મહેતાએ ધારદાર દલીલો કરતા કોર્ટને જણાવ્યું હતું કે, સોનમ સામે પોતાના જ પતિની હત્યા કરવાનું કાવતરું ઘડવાનો અત્યંત ગંભીર ગુનો છે, તેથી તેને ટેકનિકલ ગ્રાઉન્ડ પર ખુલ્લી હવામાં ફરવાની મંજૂરી આપી શકાય નહીં. સરકાર પક્ષે હાઈકોર્ટના જામીનના આદેશને સુપ્રીમ કોર્ટમાં કડક પડકાર આપ્યો છે.
શું છે આ આખી ખૌફનાક 'હનીમૂન મર્ડર' સ્ટોરી?
મૂળ ઇન્દોરના વતની અને સમૃદ્ધ ટ્રાન્સપોર્ટ બિઝનેસ સાથે સંકળાયેલા રાજા રઘુવંશીના લગ્ન ૧૧ મે, ૨૦૨૫ના રોજ સોનમ સાથે ધામધૂમથી થયા હતા. લગ્નની ખુશીઓ વચ્ચે આ નવદંપતી ૨૦ મેના રોજ હનીમૂન મનાવવા માટે મેઘાલય રવાના થયું હતું. જોકે, ૨૩ મેના રોજ સોનમે રાજા શંકાસ્પદ સંજોગોમાં ગુમ થયો હોવાની વાર્તા ઘડી કાઢી હતી. આખરે ૨ જૂનના રોજ મેઘાલયના પ્રખ્યાત પર્યટન સ્થળ સોહરા (ચેરાપુંજી) ના એક ધોધ નજીક ઊંડી અને પથરાળ ખીણમાંથી રાજા રઘુવંશીનો સડી ગયેલો મૃતદેહ મળી આવ્યો હતો.
પોલીસની ઉંડાણપૂર્વકની તપાસમાં જે ખુલાસો થયો તેણે બધાના હોશ ઉડાવી દીધા હતા. પત્ની સોનમે જ પોતાના કથિત પ્રેમી રાજ કુશવાહ અને તેના ત્રણ સોપારી કિલર મિત્રો સાથે મળીને હનીમૂનના બહાને પતિ રાજાને પહાડ પરથી નીચે ફેંકી દેવાનું ઘાતકી કાવતરું ઘડ્યું હતું. ગત વર્ષે જૂનમાં પોલીસે આ તમામ નરાધમોની ધરપકડ કરી જેલમાં મોકલી આપ્યા હતા, અને હવે આ કેસ દેશની સર્વોચ્ચ અદાલતના ચોપડે ચડ્યો છે.