​લખનૌ: ઉત્તર પ્રદેશના મુખ્યમંત્રી યોગી આદિત્યનાથે વિરોધ પક્ષો પર આકરા પ્રહારો કરતા જણાવ્યું છે કે વિપક્ષી દળોનું અસ્તિત્વ માત્ર અને માત્ર ભ્રામક પ્રચારો, જૂઠાણા અને નકારાત્મકતા પર ટકેલું છે. જ્યારે તેની સામે ભારતીય જનતા પાર્ટી (BJP) હંમેશા સત્ય, રાષ્ટ્રહિત અને વિકાસના માર્ગે મક્કમતાથી આગળ વધી રહી છે. વિપક્ષી નેતાઓ સત્તામાં હતા ત્યારે જનતા માટે કંઈ જ કરી શક્યા નહોતા અને હવે જ્યારે દેશ અને રાજ્ય પ્રગતિના પંથે છે, ત્યારે તેઓ માત્ર નકારાત્મક વાતાવરણ ઊભું કરવાનો નિષ્ફળ પ્રયાસ કરી રહ્યા છે.

​મુખ્યમંત્રીએ વિપક્ષની રાજનીતિને આડે હાથ લેતા સ્પષ્ટ શબ્દોમાં જણાવ્યું હતું કે વિપક્ષી દળો પાસે જનતાની વચ્ચે જવા માટે કોઈ નક્કર મુદ્દાઓ કે કલ્યાણકારી નીતિઓ નથી. આથી તેઓ સોશિયલ મીડિયા અને અન્ય માધ્યમો દ્વારા સતત સરકાર વિરુદ્ધ ભ્રામક નેરેટિવ સેટ કરવાનો પ્રયત્ન કરી રહ્યા છે. સત્તા ગુમાવ્યા બાદની હતાશા વિપક્ષના નિવેદનોમાં સ્પષ્ટપણે ઝળકી રહી છે. જનતાએ જેમને નકારી કાઢ્યા છે, તેઓ હવે ખોટા આક્ષેપો કરીને મીડિયામાં જીવંત રહેવા મથી રહ્યા છે. વિપક્ષનું કામ માત્ર બૂમો પાડવાનું છે અને તેઓ ભવિષ્યમાં પણ એ જ કરતા રહેશે કારણ કે તેમની પાસે જનકલ્યાણનો કોઈ રોડમેપ નથી.

​ભાજપ સરકારની ઉપલબ્ધિઓ અને સત્યનિષ્ઠાનો ઉલ્લેખ કરતા મુખ્યમંત્રી યોગી આદિત્યનાથે ઉમેર્યું હતું કે વડાપ્રધાન નરેન્દ્ર મોદીના નેતૃત્વમાં ભારતે વૈશ્વિક સ્તરે પોતાની એક આગવી ઓળખ ઊભી કરી છે. વૈશ્વિક ઉર્જા સંકટ અને આર્થિક પડકારો વચ્ચે પણ ભારત અડગ ઊભું રહ્યું છે અને દેશમાં મોંઘવારી સંપૂર્ણપણે નિયંત્રણમાં રહી છે. આત્મનિર્ભરતા જ દેશને સાચા અર્થમાં સમૃદ્ધ બનાવી શકે છે અને ભાજપ સરકાર સ્થાનિક સ્તરે લોકોને સક્ષમ અને આત્મનિર્ભર બનાવવા માટે સતત કાર્યરત છે. કિસાન કલ્યાણ, પ્રાકૃતિક ખેતી, ઇથેનોલ, બાયો-કમ્પોસ્ટ અને સીએનજી જેવા નવતર આયામો થકી દેશમાં ઉર્જા સુરક્ષા અને ખેડૂતોની સમૃદ્ધિ સુનિશ્ચિત કરવામાં આવી રહી છે.

​વધુમાં તેમણે જણાવ્યું હતું કે વિપક્ષી દળો અત્યાર સુધી જનતાના અધિકારો પર ત્રાપ મારતા આવ્યા છે. રામ મંદિર જેવા આસ્થાના વિષયો પર પણ રાજનીતિ કરનારા લોકો ભૂતકાળમાં પોતાના શાસન દરમિયાન કઈ ગતિવિધિઓને પ્રોત્સાહન આપતા હતા તે દેશની જનતા સારી રીતે જાણે છે. આજે વિપક્ષી નેતાઓ માત્ર જનતાને ગેરમાર્ગે દોરવા માટે પોતાની આસ્થાનો દેખાવ કરી રહ્યા છે, જે તેમની બેવડી નીતિ છતી કરે છે.

​મુખ્યમંત્રીએ વિશ્વાસ વ્યક્ત કર્યો હતો કે જનતા સદાય સત્યની પડખે જ રહે છે. વિપક્ષ ગમે તેટલા ભ્રામક પ્રચારો કરી લે તો પણ ભાજપ સરકારના વિકાસ કાર્યો, કાયદો અને વ્યવસ્થાની સ્થિતિ તેમજ રાષ્ટ્રવાદી વિચારધારા સામે તેમના તમામ કાવતરાં નિષ્ફળ સાબિત થશે. દેશ અને ઉત્તર પ્રદેશની જનતા સજાગ છે અને તે જૂઠાણાના સહારે ચાલતી રાજનીતિને ક્યારેય સ્વીકારશે નહીં.