તિરુવનંતપુરમ : કેરળમાં ડ્રગ્સના વધતા જતા ખતરાને ડામવા માટે રાજ્યની નવી કોંગ્રેસ સરકારે કમર કસી લીધી છે. મુખ્યમંત્રી વી.ડી. સતીસન આવતીકાલે રાજ્યમાં એક વિશાળ ડ્રગ વિરોધી ઝુંબેશ 'ઓપરેશન તુફાન: ધ નાર્કો હન્ટ' નો ઔપચારિક પ્રારંભ કરશે. આ ઝુંબેશને દક્ષિણ ભારતની અત્યાર સુધીની સૌથી મોટી ડ્રગ વિરોધી કામગીરી માનવામાં આવે છે, જેનો મુખ્ય હેતુ રાજ્યની આંતર-રાજ્ય સપ્લાય ચેઇનને તોડી પાડવાનો અને પાયાના સ્તરે રહેલા ડ્રગ હોટ-સ્પોટ્સને નષ્ટ કરવાનો છે.
ડિજિટલ નેટવર્ક અને સોશિયલ મીડિયા પર બાજ નજર
ગૃહમંત્રી રમેશ ચેન્નીથલાના નેતૃત્વમાં આ કામગીરી કેરળ પોલીસ દ્વારા હાથ ધરવામાં આવશે. પોલીસની આ ખાસ યોજનામાં સોશિયલ મીડિયાના એવા જૂથો પર નજર રાખવામાં આવશે જે કૃત્રિમ દવાઓ (synthetic drugs) ના પુરવઠા માટે જવાબદાર છે. ડ્રગ્સના સોદા માટે થતા શંકાસ્પદ નાણાકીય વ્યવહારોને ટ્રેસ કરવા માટે એક અત્યાધુનિક 'ડિજિટલ ઇન્ટેલિજન્સ નેટવર્ક' પણ ઉભું કરવામાં આવ્યું છે. પોલીસ હવે ટેકનોલોજીનો ઉપયોગ કરીને માફિયાઓના ડાર્ક વેબ અને છુપા નેટવર્કને પણ ખુલ્લા પાડશે.
સમુદાયની ભાગીદારી અને જાગૃતિ
માત્ર પોલીસ કાર્યવાહી જ નહીં, પરંતુ આ ઝુંબેશમાં જનભાગીદારીને પણ પ્રાધાન્ય આપવામાં આવ્યું છે. સમુદાયના સ્તરે હોટ-સ્પોટ્સની ઓળખ કરી તેને પોલીસને જાણ કરવા માટે ખાસ પહેલ શરૂ કરવામાં આવી છે. આ ઉપરાંત, વિદ્યાર્થીઓને નશાના રવાડે ચઢતા અટકાવવા માટે શિક્ષણ સંસ્થાઓમાં વિશેષ જાગૃતિ કાર્યક્રમોનું આયોજન કરવામાં આવશે. કેરળ પોલીસે નોંધ્યું છે કે ૨૦૨૪ માં ૨૭,૫૩૦ કેસની સરખામણીએ ૨૦૨૫ માં NDPS એક્ટ હેઠળ ૩૬,૩૧૪ કેસ નોંધાયા હતા, જે ડ્રગ્સના વધતા જતા પ્રસારને દર્શાવે છે.
દેશમાં સૌથી વધુ ડ્રગ્સના કેસ નોંધતું રાજ્ય
નેશનલ ક્રાઇમ રેકોર્ડ્સ બ્યુરો (NCRB) ના આંકડાઓ અનુસાર, ૨૦૨૩ માં સમગ્ર દેશમાં સૌથી વધુ ૩૦,૬૯૭ NDPS કેસ કેરળમાં નોંધાયા હતા. આ ગંભીર સ્થિતિને ધ્યાનમાં રાખીને, કેરળ પોલીસ હવે દક્ષિણ ભારતના અન્ય રાજ્યોની પોલીસ અને કેન્દ્ર સરકારની એજન્સીઓ સાથે સંકલન સાધીને એક મજબૂત ફિલ્ડ તૈયાર કરી રહી છે. આ 'ઓપરેશન તુફાન' દ્વારા કેરળ સરકાર યુવા પેઢીને બચાવવા માટે એક નિર્ણાયક જંગ લડવા માટે પ્રતિબદ્ધ છે.