નવી દિલ્હી :  ભારતના ડેમોગ્રાફિક ઇતિહાસમાં એક નવો અધ્યાય ઉમેરતા કેન્દ્ર સરકારે 'વસ્તી ગણતરી ૨૦૨૭' ની તારીખો અને સંપૂર્ણ સમયપત્રકની સત્તાવાર જાહેરાત કરી દીધી છે. આ મહાઅભિયાન અંતર્ગત સમગ્ર દેશમાં ૨૫ જાન્યુઆરીથી ૨૮ ફેબ્રુઆરી, ૨૦૨૭ દરમિયાન મુખ્ય વસ્તી ગણતરી હાથ ધરવામાં આવશે. સરકારે આ ગણતરી માટે ૧ માર્ચ, ૨૦૨૭ ના રોજ મધ્યરાત્રિ ૧૨:૦૦ વાગ્યાને સંદર્ભ સમય  તરીકે નિર્ધારિત કર્યો છે. મુખ્ય ગણતરી પૂર્ણ થયા બાદ ૧ માર્ચથી ૫ માર્ચ, ૨૦૨૭ દરમિયાન એક વિશેષ 'રિવિઝન રાઉન્ડ' યોજાશે, જેમાં એકત્રિત કરાયેલી તમામ વિગતોનું પુનઃનિરીક્ષણ અને ચકાસણી કરવામાં આવશે.

આ વખતે વસ્તી ગણતરી પ્રક્રિયાને વધુ સરળ અને આધુનિક બનાવવા માટે સરકારે 'વૈકલ્પિક સ્વ-ગણતરી' નો એક ક્રાંતિકારી વિકલ્પ પૂરો પાડ્યો છે. નાગરિકો જો ઇચ્છે તો મુખ્ય ગણતરી શરૂ થાય તે પહેલાં જ, એટલે કે ૧૦ જાન્યુઆરીથી ૨૪ જાન્યુઆરી, ૨૦૨૭ ની વચ્ચે ડિજિટલ પ્લેટફોર્મ મારફતે પોતાના પરિવારની તમામ માહિતી જાતે જ ઓનલાઇન પોર્ટલ પર નોંધી શકશે. જે લોકો ઓનલાઇન વિગતો નોંધવાનું ચુકી જશે અથવા જાતે ડેટા એન્ટ્રી કરવા માગતા નથી, તેમના ઘરે ૨૫ જાન્યુઆરીથી પ્રશિક્ષિત ગણતરીકા રૂબરૂ જઈને માહિતી એકત્રિત કરશે.

જોકે, ભૌગોલિક અને રાજકીય સ્થિતિઓને ધ્યાનમાં રાખીને સરકારે કેટલાક રાજ્યો અને પ્રદેશો માટે આ સમયપત્રકમાં ખાસ છૂટછાટ આપી છે. ચૂંટણીથી બંધાયેલા રાજ્યો જેવા કે મણિપુર, ગોવા, ઉત્તર પ્રદેશ, પંજાબ અને ઉત્તરાખંડમાં આ સમયગાળા દરમિયાન ગણતરી યોજાશે નહીં. આ ઉપરાંત, ભારે હિમવર્ષા અને વિષમ હવામાનનો સામનો કરી રહેલા લદ્દાખ, હિમાચલ પ્રદેશ તેમજ જમ્મુ અને કાશ્મીરના બરફાચ્છાદિત વિસ્તારોને પણ આ તબક્કામાંથી મુક્તિ આપવામાં આવી છે, જ્યાં સાનુકૂળ હવામાન થતાં અલગથી ગણતરી હાથ ધરાશે. આ વિસ્તારો સિવાય દેશના બાકીના તમામ રાજ્યો અને કેન્દ્રશાસિત પ્રદેશોમાં વસ્તી ગણતરી નિર્ધારિત ટાઇમટેબલ મુજબ જ યોજાશે.