ભુવનેશ્વર : ઓડિસા સરકારે ભ્રષ્ટાચાર વિરુદ્ધ શૂન્ય સહનશીલતાની નીતિ અપનાવતા એક મોટું પગલું ભર્યું છે. રાજ્ય સરકારે સત્તાવાર આદેશ જારી કરીને પ્રોબેશનરી ઓડિસા રેવન્યુ સર્વિસ એટલે કે ઓઆરએસ અધિકારી મનીષા મિશ્રાની સેવાઓ તાત્કાલિક અસરથી સમાપ્ત કરી દીધી છે. સાત હજાર રૂપિયાની લાંચ સ્વીકારવાના આરોપમાં તેમની ધરપકડ થયા બાદ આ કાર્યવાહી કરવામાં આવી છે.

મળતી માહિતી મુજબ, આરોપી અધિકારી મનીષા મિશ્રા બાલાસોર જિલ્લાના બલિયાપાલમાં સબ-રજિસ્ટ્રાર તરીકે ફરજ બજાવી રહ્યા હતા. ગત સાતમી નવેમ્બરના રોજ વિજિલન્સ વિભાગના અધિકારીઓએ તેમને તેમની જ ઓફિસમાં એક ફરિયાદી પાસેથી ગેરકાયદેસર નાણાં સ્વીકારતા કથિત રીતે રંગે હાથે ઝડપી લીધા હતા. આ ઘટના બાદ વહીવટી વર્તુળોમાં ભારે ચકચાર મચી ગઈ હતી.

મહેસૂલ અને આપત્તિ વ્યવસ્થાપન વિભાગ દ્વારા જારી કરાયેલા સત્તાવાર આદેશમાં સ્પષ્ટપણે જણાવવામાં આવ્યું છે કે સામાન્ય વહીવટ અને વિજિલન્સ વિભાગ દ્વારા સબમિટ કરવામાં આવેલા અહેવાલની ઊંડાણપૂર્વક ચકાસણી કરવામાં આવી હતી. આ પછી તેમની સામેના આરોપોની ગંભીરતાને ધ્યાનમાં રાખીને આ મોટો નિર્ણય લેવામાં આવ્યો છે.

આદેશમાં એવું પણ કહેવામાં આવ્યું છે કે વિભાગ સંપૂર્ણપણે સંતુષ્ટ છે કે આરોપી અધિકારીનું સેવામાં આગળ ચાલુ રહેવું જનહિત માટે ખૂબ જ જોખમી અને નુકસાનકારક છે. મનીષા મિશ્રાએ વર્ષ ૨૦૨૪માં જ સરકારી સેવામાં પ્રવેશ કર્યો હતો અને ધરપકડ થઈ ત્યારે તેઓ પ્રોબેશનરી પિરિયડમાં હતા.

સરકારે આ ઘટનાને ગંભીર ભ્રષ્ટાચાર ગણાવતા જણાવ્યું છે કે આ ઘોર ગેરવર્તણૂક છે અને ઓડિસા સરકારી કર્મચારી આચાર નિયમો ૧૯૫૯નું સ્પષ્ટ ઉલ્લંઘન છે. આ કડક પગલાથી સરકારે સ્પષ્ટ સંદેશો આપી દીધો છે કે વહીવટી તંત્રમાં ભ્રષ્ટાચાર ચલાવી લેવામાં આવશે નહીં.