નવી દિલ્હી:  NEET-UG ૨૦૨૬ ની પરીક્ષામાં પેપર લીકના ગંભીર આરોપો અને દેશવ્યાપી આક્રોશ બાદ, કેન્દ્ર સરકારે નેશનલ ટેસ્ટિંગ એજન્સી (NTA) ના વહીવટી માળખામાં મોટું ઓપરેશન પાર પાડ્યું છે. પરીક્ષાની વિશ્વસનીયતા પર ઉઠેલા સવાલો વચ્ચે સરકારે NTA માં બે નવા જોઈન્ટ ડિરેક્ટર અને બે જોઈન્ટ સેક્રેટરીની નિમણૂક કરીને એજન્સીને નવું સ્વરૂપ આપવાનો પ્રયાસ કર્યો છે. આ નિમણૂકો કેબિનેટની નિમણૂક સમિતિ (ACC) ની મંજૂરી બાદ કરવામાં આવી છે, જેનો મુખ્ય હેતુ આગામી સમયમાં લેવાનારી JEE Main અને CUET જેવી મહત્વની પરીક્ષાઓને વિવાદમુક્ત અને સુરક્ષિત બનાવવાનો છે.

આ નવા ફેરફારમાં ભારતીય મહેસૂલ સેવા (IRS) ના તેજતર્રાર અધિકારી આકાશ જૈન અને ભારતીય ઓડિટ એન્ડ એકાઉન્ટ્સ સેવાના આદિત્ય રાજેન્દ્ર ભોજગઢિયાને સંયુક્ત નિયામક (Joint Director) તરીકેની જવાબદારી સોંપાઈ છે. આ બંને અધિકારીઓને લેટરલ ટ્રાન્સફર દ્વારા લાવીને એજન્સીના સંચાલનમાં સખ્તાઈ લાવવાના સંકેત આપવામાં આવ્યા છે. તેમની સાથે ૧૯૯૮ બેચના આંકડાકીય સેવાના અધિકારી અનુજા બાપટ અને ૨૦૦૪ બેચના IRS અધિકારી રુચિતા વિજને સંયુક્ત સચિવ (Joint Secretary) તરીકે નિયુક્ત કરવામાં આવ્યા છે. આ ઉચ્ચ અધિકારીઓની ટીમ આગામી પાંચ વર્ષ સુધી NTA ની પરીક્ષા પ્રક્રિયાને પારદર્શક બનાવવાનું કામ કરશે.

ઉલ્લેખનીય છે કે ૩ મેના રોજ યોજાયેલી NEET પરીક્ષા રદ થયા બાદ લાખો વિદ્યાર્થીઓનું ભવિષ્ય જોખમમાં મુકાયું હતું, જેની તપાસ હાલમાં CBI દ્વારા કરવામાં આવી રહી છે. હવે જ્યારે ૨૧ જૂને ફરીથી પરીક્ષા યોજાવા જઈ રહી છે, ત્યારે આ નવા અધિકારીઓ માટે પરીક્ષા કેન્દ્રોનું સંચાલન, ડેટા સિક્યુરિટી અને પ્રશ્નપત્રોની ગોપનીયતા જાળવવી એ સૌથી મોટો પડકાર બની રહેશે. સરકારના આ પગલાને શિક્ષણ જગતના નિષ્ણાતો 'શુદ્ધિકરણ અભિયાન' તરીકે જોઈ રહ્યા છે, જેથી ભવિષ્યમાં પેપર લીક જેવી ઘટનાઓ પર કાયમી બ્રેક લગાવી શકાય.