નવી દિલ્હી : દેશભરમાં ભારે ચર્ચાસ્પદ બનેલા NEET પેપર લીક કાંડ બાદ નેશનલ ટેસ્ટિંગ એજન્સી (NTA) ની પરીક્ષા પદ્ધતિને વધુ મજબૂત, પારદર્શક અને 'લીક-પ્રૂફ' બનાવવા માટે કેન્દ્ર સરકારે કમર કસી છે. NTA માં વ્યાપક સુધારા સૂચવવા માટે ઈન્ફોસિસના સહ-સ્થાપક નંદન નિલેકણીના અધ્યક્ષપદે રચાયેલી ઉચ્ચ-સ્તરીય ટાસ્ક ફોર્સે ISRO ના ભૂતપૂર્વ અધ્યક્ષ અને NTA સુધારણા કમિટીના વડા કે. રાધાકૃષ્ણન સાથે મહત્વપૂર્ણ પરામર્શ કર્યો છે.

આ જુલાઈમાં વડાપ્રધાન નરેન્દ્ર મોદી દ્વારા જાહેર કરાયેલી આ ટાસ્ક ફોર્સ હાલમાં વિવિધ હિતધારકો—જેવા કે વિદ્યાર્થીઓ, વાલીઓ, શિક્ષકો, શૈક્ષણિક સંસ્થાઓ અને પરીક્ષા નિષ્ણાતો પાસેથી સૂચનો મેળવી રહી છે. રાધાકૃષ્ણન સમિતિએ અગાઉ NTA ના સંપૂર્ણ પુનર્ગઠન અંગે ૧૦૧ જેટલી કડક ભલામણો કરી હતી, જેમાં પ્રશ્નપત્ર વ્યવસ્થા, એડમિટ કાર્ડ, કમ્પ્યુટર-આધારિત પરીક્ષા પ્લેટફોર્મ અને પરિણામ પ્રણાલી માટે સુરક્ષા નિયંત્રણો વધારવાનો સમાવેશ થાય છે. નંદન નિલેકણીની ટાસ્ક ફોર્સ આ તમામ અગાઉની ભલામણો અને સુપ્રીમ કોર્ટના નિર્દેશોનો ઊંડાણપૂર્વક અભ્યાસ કરી રહી છે.

સાત સભ્યોની આ હાઈ-પાવર્ડ ટાસ્ક ફોર્સમાં ISRO ના ભૂતપૂર્વ અધ્યક્ષ એસ. સોમનાથ, IB ના ભૂતપૂર્વ ડાયરેક્ટર તપન ડેકા અને IIT મદ્રાસના ડાયરેક્ટર વી. કામકોટી જેવા દિગ્ગજો સામેલ છે. આ ટાસ્ક ફોર્સનો મુખ્ય ઉદ્દેશ્ય NTA ની કામગીરીને માત્ર ઉચ્ચ શિક્ષણની પ્રવેશ પરીક્ષાઓ પૂરતી સીમિત રાખીને, તેમાં અદ્યતન ડિજિટલ ટેક્નોલોજીનો ઉપયોગ કરવાનો છે, જેથી ભવિષ્યમાં કોઈપણ પરીક્ષામાં પેપર લીક કે ગેરરીતિ જેવી ઘટનાઓ અટકાવી શકાય. ટૂંક સમયમાં જ આ સમિતિ પોતાનો આખરી અહેવાલ સરકારને સુપ્રત કરશે.