નાગપુર, તા.25: દેશના સામાન્ય નાગરિકો માટે ખૂબ જ રાહતના સમાચાર સામે આવ્યા છે. કેન્દ્રીય માર્ગ અને પરિવહન પ્રધાન નીતિન ગડકરીએ એક અત્યાધુનિક અને સંપૂર્ણ સ્વદેશી 'ઈથેનોલ કૂકિંગ સ્ટવ' ટેકનોલોજી રજૂ કરી છે, જે આગામી સમયમાં રસોડામાં ક્રાંતિ લાવી શકે છે. આ નવી ટેકનોલોજી દ્વારા માત્ર 7 ટકા ઈથેનોલ અને પાણીના મિશ્રણનો ઉપયોગ કરીને સ્ટવ સળગાવી શકાશે, જે પરંપરાગત LPG સિલિન્ડર કરતા ઘણો સસ્તો અને સલામત વિકલ્પ સાબિત થશે.
નાગપુરમાં આયોજિત એક કાર્યક્રમમાં ગડકરીએ આ ટેકનોલોજીની વિશેષતાઓ સમજાવતા જણાવ્યું હતું કે, ભારત પોતાની જરૂરિયાતના લગભગ 87 ટકા ક્રૂડ ઓઈલની આયાત કરે છે, જે દેશની આર્થિક સ્થિતિ પર મોટો બોજ છે. ઈથેનોલના ઉપયોગથી માત્ર વિદેશી હૂંડિયામણની બચત જ નહીં થાય, પરંતુ ઘરેલું રસોઈના ખર્ચમાં પણ નોંધપાત્ર ઘટાડો થશે. સરકારે 2014માં જે ઈથેનોલ મિશ્રણનું પ્રમાણ માત્ર 1.53 ટકા રાખ્યું હતું, તે 2025 સુધીમાં 20 ટકા સુધી પહોંચાડીને એક મોટું લક્ષ્ય સિદ્ધ કર્યું છે.
આ પ્રોજેક્ટનો મુખ્ય ઉદ્દેશ્ય સામાન્ય પરિવારની LPG સિલિન્ડર પરની નિર્ભરતા ઘટાડવાનો છે. નિષ્ણાતોના મતે, જો આ ટેકનોલોજીને મોટા પાયે વ્યાપારી ધોરણે લાગુ કરવામાં આવે, તો તે ભારતની સ્વચ્છ ઊર્જા (Clean Energy) ઈન્ફ્રાસ્ટ્રક્ચરને વિશ્વના નકશા પર મજબૂત બનાવશે. સ્થાનિક સ્તરે વિકસિત આ સ્ટવ માત્ર સસ્તો જ નહીં, પરંતુ ગૃહિણીઓ માટે રસોઈ બનાવવાની પદ્ધતિમાં પણ ધરખમ ફેરફાર લાવશે.
આ ઉપરાંત, નીતિન ગડકરીએ વિજ્ઞાન અને ટેકનોલોજી ક્ષેત્રે દેશના યુવાનો અને બાળકોમાં જાગૃતિ લાવવા માટે રૂપિયા 40 કરોડની વિશેષ યોજના પર પણ કામ શરૂ કર્યું છે. સરકાર માને છે કે નવી ટેકનોલોજીના પ્રસારથી જ ભારત 'આત્મનિર્ભર' બનશે. ટૂંક સમયમાં જ જ્યારે આ ઈથેનોલ સ્ટવ બજારમાં ઉપલબ્ધ થશે, ત્યારે તે લાખો મધ્યમવર્ગીય પરિવારો માટે ગેસના ભાવવધારા સામે એક સુરક્ષા કવચ બની રહેશે.