નવી દિલ્હી : સંયુક્ત રાષ્ટ્ર સુરક્ષા પરિષદ (UNSC)ની 2028-29ની અસ્થાયી સભ્યતા માટે ભારતની દાવેદારીને લઈને હવે ચીનની પણ પ્રતિક્રિયા સામે આવી છે. ચીને જણાવ્યું છે કે, તે ભારતની ઉમેદવારી સંબંધિત ઘટનાઓ પર નજર રાખી રહ્યું છે. આ નિવેદન એવા સમયે આવ્યું છે, જ્યારે વિદેશ મંત્રી એસ. જયશંકરે ન્યૂયોર્ક સ્થિત સંયુક્ત રાષ્ટ્ર મુખ્યાલયમાં ભારતના ચૂંટણી અભિયાનની સત્તાવાર શરૂઆત કરી છે

 ચીનના વિદેશ મંત્રાલયના પ્રવક્તા લિન જિયાનને ભારતની ઉમેદવારી અંગે પ્રશ્ન પૂછવામાં આવ્યો હતો. તેના જવાબમાં તેમણે જણાવ્યું કે ચીને આ સંબંધિત અહેવાલો પર ધ્યાન આપ્યું છે. જોકે, ભારતને સમર્થન આપશે કે નહીં અથવા વિરોધ કરશે કે નહીં, તે અંગે તેમણે કોઈ સ્પષ્ટ નિવેદન આપ્યું નથી.

વિદેશ મંત્રી એસ. જયશંકરે સોમવારે સંયુક્ત રાષ્ટ્ર મુખ્યાલયમાં આયોજિત કાર્યક્રમ દરમિયાન 2028-29 માટે UNSCની અસ્થાયી સભ્યતા માટે ભારતના ચૂંટણી અભિયાનની શરૂઆત કરી હતી. આ કાર્યક્રમમાં અનેક દેશોના રાજદૂતો અને વરિષ્ઠ અધિકારીઓ હાજર રહ્યા હતા.

પોતાના સંબોધનમાં જયશંકરે જણાવ્યું કે સંયુક્ત રાષ્ટ્ર પ્રત્યે ભારતનો અભિગમ શાંતિ, વિશ્વાસ, નિયમોનું સન્માન અને ઈમાનદારી પર આધારિત છે. તેમણે એ પણ જણાવ્યું કે જો ભારત ચૂંટાશે તો સુરક્ષા પરિષદમાં તે કઈ પ્રાથમિકતાઓ પર કામ કરશે.

ચીન સંયુક્ત રાષ્ટ્ર સુરક્ષા પરિષદના પાંચ કાયમી સભ્યોમાં સામેલ છે અને તેને વીટોનો અધિકાર પણ છે. તેમ છતાં, તેણે અત્યાર સુધી ભારતની કાયમી સભ્યતાનું ખુલ્લેઆમ સમર્થન કર્યું નથી. બીજી તરફ અમેરિકા, રશિયા, ફ્રાન્સ અને બ્રિટન અનેક વખત ભારતની કાયમી સભ્યતાને ખુલ્લું સમર્થન આપી ચૂક્યા છે.

UNSCની 2028-29ની અસ્થાયી સભ્યતા માટેની ચૂંટણી આગામી વર્ષે જૂનમાં યોજાશે. એશિયા-પ્રશાંત જૂથની એક બેઠક માટે ભારતનો મુકાબલો તાજિકિસ્તાન સાથે થશે.

ભારત અગાઉ 2021-22 દરમિયાન સુરક્ષા પરિષદનું અસ્થાયી સભ્ય રહી ચૂક્યું છે. ઉપરાંત ભારત 1950-51, 1967-68, 1972-73, 1977-78, 1984-85, 1991-92 અને 2011-12 દરમિયાન પણ સુરક્ષા પરિષદનું અસ્થાયી સભ્ય રહી ચૂક્યું છે.

ભારત લાંબા સમયથી કહી રહ્યું છે કે સંયુક્ત રાષ્ટ્ર સુરક્ષા પરિષદનું વર્તમાન માળખું લગભગ 80 વર્ષ જૂનું છે અને આજના વૈશ્વિક પડકારોને ધ્યાનમાં રાખીને તેમાં સુધારા કરવાની જરૂર છે.

ભારતનું માનવું છે કે વિકાસશીલ દેશોને સુરક્ષા પરિષદમાં વધુ પ્રતિનિધિત્વ મળવું જોઈએ, જેથી વૈશ્વિક નિર્ણયો લેવામાં તેમની ભાગીદારી વધે.

સંયુક્ત રાષ્ટ્રમાં ભારતના કાયમી પ્રતિનિધિ હરીશ પરવથનેનીએ પણ જણાવ્યું કે વિશ્વના અનેક વિસ્તારોમાં ચાલી રહેલા સંઘર્ષો દરમિયાન સુરક્ષા પરિષદ અસરકારક ભૂમિકા ભજવી શકી નથી. તેથી સંયુક્ત રાષ્ટ્ર અને અન્ય વૈશ્વિક સંસ્થાઓમાં સુધારા સમયની જરૂરિયાત બની ગયા છે..