ઓકલેન્ડ : હવાઈ મુસાફરીમાં ઇકોનોમી ક્લાસના મુસાફરો માટે સૌથી મોટી સમસ્યા બેસીને કલાકો સુધી સફર કરવાની હોય છે, પરંતુ એર ન્યુઝીલેન્ડે હવે આ સમસ્યાનો કાયમી ઉકેલ શોધી કાઢ્યો છે. એરલાઇને તેની અલ્ટ્રા-લોંગ-હલ (ખૂબ લાંબા અંતરની) ફ્લાઇટ્સ માટે વિશ્વના પ્રથમ 'સ્કાયનેસ્ટ' સ્લીપિંગ પોડ્સનું અનાવરણ કર્યું છે. આ સુવિધાથી હવે ઇકોનોમીના મુસાફરો પણ બિઝનેસ ક્લાસમાં અપગ્રેડ થયા વિના આરામદાયક પથારી પર સૂઈને પ્રવાસ કરી શકશે.
શું છે આ ‘સ્કાયનેસ્ટ’ અને કેવી છે સુવિધા?
સ્કાયનેસ્ટ એ છ સ્લીપિંગ પોડ્સનું એક બંક-બેડ લેઆઉટ છે, જે બોઇંગ 787-9 એરક્રાફ્ટમાં ઇકોનોમી અને પ્રીમિયમ ઇકોનોમી કેબિનની વચ્ચે લગાવવામાં આવશે. દરેક પોડમાં નરમ ગાદલું, ઓશીકું, ગરમ ધાબળો અને પ્રાઇવસી માટે પડદાની સુવિધા આપવામાં આવી છે. એટલું જ નહીં, મુસાફરોને આરામદાયક ઊંઘ માટે આઈ માસ્ક, ઇયરપ્લગ અને સ્કીનકેર કીટ જેવી 'નેસ્ટેસીટી' કીટ પણ મળશે. દરેક બેડ અંદાજે 6.6 ફૂટ લાંબો છે, જેથી ઊંચા મુસાફરો પણ સરળતાથી સૂઈ શકશે.
4 કલાકના સેશન માટે બુકિંગ અને કિંમત
મુસાફરો તેમની 17-18 કલાકની લાંબી મુસાફરી દરમિયાન 4 કલાકના સ્લોટ માટે આ પોડ બુક કરી શકશે. આ એક વધારાની (Add-on) સેવા છે, જેના માટે નિયમિત ટિકિટ ઉપરાંત અંદાજે $495 (આશરે ₹47,000) ચૂકવવા પડશે. જો તમે તમારી ઇકોનોમી ટિકિટ સાથે આ સ્લીપિંગ સુવિધા મેળવવા માંગો છો, તો કુલ ખર્ચ અંદાજે ₹1.3 લાખ સુધી પહોંચી શકે છે. દરેક સત્ર પછી, કેબિન ક્રૂ માત્ર 30 મિનિટમાં પોડને સાફ કરીને બેડશીટ બદલી નાખશે જેથી આગામી મુસાફર માટે તે તૈયાર રહે.
બુકિંગ તારીખ અને નિયમો
સ્કાયનેસ્ટનું બુકિંગ આગામી 18 મેથી શરૂ થઈ જશે અને તેની પ્રથમ ઉડાન નવેમ્બર 2026માં શરૂ થવાની અપેક્ષા છે. આ સુવિધા 15 વર્ષ કે તેથી વધુ ઉંમરના મુસાફરો માટે જ ઉપલબ્ધ રહેશે. પોડની અંદર ખાવાની કે એક જ પોડમાં બે વ્યક્તિઓને રહેવાની સખત મનાઈ છે. જ્યારે તમારો 4 કલાકનો સમય પૂરો થશે, ત્યારે પોડની લાઈટો આપમેળે ચાલુ થઈ જશે, જે તમને ધીમેથી જગાડવાનો સંકેત આપશે.
એર ન્યુઝીલેન્ડના ચીફ એક્ઝિક્યુટિવ નિખિલ રવિશંકરે જણાવ્યું હતું કે, આ પહેલથી લાંબા અંતરની મુસાફરી વધુ વ્યવસ્થિત અને ઓછી થકાવનારી બનશે. ખાસ કરીને ન્યૂ યોર્ક અને ઓકલેન્ડ જેવા લાંબા રૂટ પર આ સુવિધા મુસાફરો માટે આશીર્વાદરૂપ સાબિત થશે.