મોસ્કો: રશિયાના આજીવન પ્રેસિડેન્ટ વ્લાદિમીર પુતિન ૧૯ અને ૨૦ મેના રોજ ચીનની મુલાકાતે જશે. રાષ્ટ્રપતિ શી જિનપિંગના આમંત્રણથી યોજાઈ રહેલી આ મુલાકાત દરમિયાન બંને નેતાઓ દ્વિપક્ષીય સંબંધો, વ્યૂહાત્મક ભાગીદારી અને વૈશ્વિક મુદ્દાઓ પર ચર્ચા કરશે. આ પ્રવાસ બંને દેશો વચ્ચેની મિત્રતા અને સહકાર સંધિની ૨૫મી વર્ષગાંઠ નિમિત્તે યોજાઈ રહ્યો છે. અમેરિકી રાષ્ટ્રપતિ ડોનાલ્ડ ટ્રમ્પની ચીન મુલાકાત બાદ તરત જ યોજાઈ રહેલી પુતિનની આ મુલાકાત આંતરરાષ્ટ્રીય રાજકારણમાં ખૂબ જ સૂચક માનવામાં આવે છે.

રશિયાના રાષ્ટ્રપતિ વ્લાદિમીર પુતિન આગામી ૧૯ અને ૨૦ મેના રોજ ચીનની બે દિવસીય સત્તાવાર મુલાકાતે જઈ રહ્યા છે. રશિયાના વિદેશ મંત્રાલય અને ચીન સરકાર દ્વારા સત્તાવાર રીતે આ મુલાકાતની પુષ્ટિ કરવામાં આવી છે. ચીનના રાષ્ટ્રપતિ શી જિનપિંગના વિશેષ આમંત્રણ પર યોજાઈ રહેલો આ પ્રવાસ બંને દેશો વચ્ચેના ગાઢ સંબંધોનું વધુ એક પ્રમાણ છે.

સંધિની ૨૫મી વર્ષગાંઠની ઉજવણી: રશિયન વિદેશ મંત્રાલયની સત્તાવાર માહિતી મુજબ, પુતિનનો આ પ્રવાસ બંને દેશો વચ્ચે ઐતિહાસિક સદ્ભાવના, મિત્રતા અને સહકારની સંધિ પર હસ્તાક્ષર કર્યાની ૨૫મી વર્ષગાંઠના અવસરે યોજાઈ રહ્યો છે. આ સંધિને બંને દેશો વચ્ચેના વર્તમાન રાજદ્વારી અને આર્થિક સંબંધોનો પાયો માનવામાં આવે છે.

મહત્વપૂર્ણ બેઠકો અને કરારો: પોતાના બે દિવસીય પ્રવાસ દરમિયાન રાષ્ટ્રપતિ પુતિન અને શી જિનપિંગ વચ્ચે ઉચ્ચ સ્તરીય બેઠક યોજાશે. આ બેઠકમાં બંને નેતાઓ વર્તમાન દ્વિપક્ષીય એજન્ડા, વ્યાપક ભાગીદારીને વધુ ઊંડી બનાવવાની રીતો અને વ્યૂહાત્મક સહયોગ અંગે ચર્ચા કરશે. આ ઉપરાંત, વર્તમાન આંતરરાષ્ટ્રીય અને પ્રાદેશિક મુદ્દાઓ પર પણ મહત્વપૂર્ણ મંત્રણા કરવામાં આવશે.

બંને નેતાઓ રશિયા અને ચીન માટે શિક્ષણના વર્ષ ૨૦૨૬-૨૦૨૭ના સત્તાવાર ઉદ્ઘાટન સમારોહમાં હાજરી આપશે. વાટાઘાટોના અંતે બંને દેશો દ્વારા એક સંયુક્ત નિવેદન બહાર પાડવામાં આવશે, તેમજ બંને દેશો વચ્ચે અનેક દ્વિપક્ષીય અને આંતર-સરકારી કરારો પર હસ્તાક્ષર થવાની અપેક્ષા છે.

આર્થિક સંબંધો પર ભાર: પુતિનના પ્રવાસના કાર્યક્રમમાં ચીનના પ્રીમિયર લી કિયાંગ સાથેની વિશેષ મુલાકાતનો પણ સમાવેશ થાય છે. આ બેઠકમાં મુખ્યત્વે રશિયા અને ચીન વચ્ચેના વેપાર અને આર્થિક સહયોગની ભાવિ સંભાવનાઓ પર ચર્ચા કરવામાં આવશે. વર્તમાન વૈશ્વિક સંજોગોમાં ચીન રશિયાનું સૌથી મોટું આર્થિક ભાગીદાર બની ગયું છે, ત્યારે આ બેઠક વ્યાપારી દૃષ્ટિએ ઘણું મહત્વ ધરાવે છે.

આંતરરાષ્ટ્રીય રાજકારણની દૃષ્ટિએ મહત્વ: પુતિનનો આ પ્રવાસ એવા સમયે યોજાઈ રહ્યો છે જ્યારે અમેરિકાના પ્રેસિડેન્ટ ડોનાલ્ડ ટ્રમ્પની ચીન મુલાકાત હમણાં જ પૂર્ણ થઈ છે. અમેરિકન રાષ્ટ્રપતિના પ્રવાસ બાદ તરત જ રશિયન રાષ્ટ્રપતિની ચીન મુલાકાત વૈશ્વિક મંચ પર એક મહત્વપૂર્ણ સંદેશ આપે છે અને ભૌગોલિક રાજનીતિના નવા સમીકરણો તરફ ઈશારો કરે છે.

સૌની નજર ૧૯ મી તારીખ ઉપર છે. જ્યારે પુતીનના આગમન સમયે શી જિનપિંગ તેમને આવકારવા વિમાન મથકે જાય છે કે કેમ ? તે જોવાનું રહ્યું. ટ્રમ્પને આવકારવા માટે શી જીનપિંગ એરપોર્ટ પર નોટ ગયા પરંતુ તેમના સ્થાને ચીનના ઉપરાષ્ટ્રપતિ ગયા હતા..