નવી દિલ્હી: ભારતના આકાશમાં ઉડતા દર ૧૦ વિમાનોમાંથી ૩ વિમાનો ઉત્તર ભારતના એરપોર્ટ્સ પરથી ઉડાન ભરે છે અથવા ત્યાં લેન્ડ થાય છે. એરપોર્ટ્સ ઓથોરિટી ઓફ ઈન્ડિયા (AAI) ના પ્રાદેશિક નિર્દેશક અજય કુમાર કપૂરે એક મહત્વપૂર્ણ ખુલાસો કરતા જણાવ્યું છે કે, દેશના કુલ પેસેન્જર ટ્રાફિકનો લગભગ ૩૦ ટકા હિસ્સો એકલું ઉત્તર ભારત સંભાળે છે. આંકડાકીય રીતે જોઈએ તો, દેશના વિમાનોની ૨૬ ટકા હિલચાલ અને ૨૫ ટકાથી વધુ હવાઈ ટ્રાફિક સાથે આ પ્રદેશ ભારતીય એરલાઇન્સ ક્ષેત્ર માટે 'પાવરહાઉસ' સાબિત થઈ રહ્યો છે.

ધુમ્મસનો પડકાર અને આધુનિક ઉકેલ

શિયાળાની ઋતુમાં ઉત્તર ભારતનું ગાઢ ધુમ્મસ ફ્લાઇટ ઓપરેશન માટે હંમેશા માથાનો દુખાવો રહ્યું છે. અજય કુમાર કપૂરે સ્વીકાર્યું કે ધુમ્મસને કારણે ફ્લાઇટ્સ રદ થવાથી ટર્મિનલ્સ પર મુસાફરોની ભારે ભીડ થાય છે. જોકે, આ સમસ્યાને પહોંચી વળવા માટે AAI હવે 'સેન્ટ્રલ એર ટ્રાફિક ફ્લો મેનેજમેન્ટ' (CATFM) સિસ્ટમનો ઉપયોગ કરી રહ્યું છે. આ આધુનિક સિસ્ટમ દ્વારા ધુમ્મસના દિવસોમાં પણ વિમાનોની અવરજવરને સુવ્યવસ્થિત કરીને મુસાફરોની હાલાકી ઘટાડવાનો પ્રયાસ કરવામાં આવી રહ્યો છે.

નવા એરપોર્ટ ટર્મિનલ્સનું લિસ્ટ

વધતી જતી માંગને પહોંચી વળવા માટે ઉત્તર ભારતના અનેક શહેરોમાં એરપોર્ટના વિસ્તરણનું કામ યુદ્ધના ધોરણે ચાલી રહ્યું છે:

• જોધપુર એરપોર્ટ: નવું ટર્મિનલ લગભગ તૈયાર છે અને જુલાઈમાં તેનું ઉદ્ઘાટન થવાની શક્યતા છે.
• વારાણસી એરપોર્ટ: આ વર્ષે ડિસેમ્બર અથવા જાન્યુઆરી સુધીમાં નવું ટર્મિનલ શરૂ થશે, જ્યારે જૂની ઇમારતને આંતરરાષ્ટ્રીય ફ્લાઇટ્સ માટે રિઝર્વ રખાશે.
• જમ્મુ, લેહ અને ઉદયપુર: આ એરપોર્ટ્સ પર પણ નવી ટર્મિનલ ઇમારતોનું કામ પ્રગતિમાં છે.
• આગ્રા એરપોર્ટ: વર્ષ ૨૦૨૮ સુધીમાં અહીં એક અત્યાધુનિક નવું ટર્મિનલ તૈયાર થઈ જશે.

કનેક્ટિવિટીના નવા રૂટ

પ્રાદેશિક કનેક્ટિવિટી યોજના (UDAN) હેઠળ દિલ્હી-હિસાર-અયોધ્યા રૂટ સફળતાપૂર્વક શરૂ કરી દેવાયો છે. જોકે, અલીગઢ, આઝમગઢ અને કુશીનગર જેવા એરપોર્ટ્સ અત્યારે કાર્યરત નથી, તેનું મુખ્ય કારણ ભારતમાં નાના વિમાનોની અછત હોવાનું જણાવાયું છે. કપૂરે આશાવાદ વ્યક્ત કર્યો હતો કે એરલાઇન્સ સાથે કુશીનગર એરપોર્ટ શરૂ કરવા માટે વાતચીત ચાલી રહી છે અને ટૂંક સમયમાં બૌદ્ધ સર્કિટના આ મહત્વના એરપોર્ટ પરથી ઉડાનો શરૂ થશે.

ઉત્તર ભારતમાં વધતા જતા ટ્રાફિકને જોતા આગામી પાંચ વર્ષમાં આ પ્રદેશના એરપોર્ટ્સ વિશ્વના શ્રેષ્ઠ એરપોર્ટ્સની હરોળમાં સ્થાન પામશે તેવી તૈયારીઓ અત્યારથી જ કરી લેવામાં આવી છે.