વોશિંગ્ટન : અમેરિકાનો પૂર્વ કિનારો હાલમાં અત્યંત ખતરનાક અને વિનાશક પ્રકૃતિનો સામનો કરી રહ્યો છે. એક શક્તિશાળી 'નોર'ઇસ્ટર' વાવાઝોડાએ મધ્ય-એટલાન્ટિકથી ન્યૂ ઇંગ્લેન્ડ સુધી તબાહી મચાવી દીધી છે.

આ વિનાશક વાવાઝોડાએ સતત મુશળધાર વરસાદ, જોરદાર પવન, ખતરનાક દરિયાઈ મોજા અને વિશાળ દરિયાકાંઠાના પૂર લાવ્યા છે, જેના કારણે સામાન્ય જનજીવન સંપૂર્ણપણે ખોરવાઈ ગયું છે. 'નોર'ઇસ્ટર' એક અત્યંત શક્તિશાળી હવામાન પ્રણાલી છે જે અમેરિકાના પૂર્વ કિનારાની નજીક અથવા તેની ઉપર વિકસે છે.

આ ખતરનાક વાવાઝોડાએ અમેરિકાના ઘણા રાજ્યોમાં ભારે વિનાશ મચાવ્યો છે. વાવાઝોડાને કારણે વૃક્ષો, ડાળીઓ અને વીજળીની લાઇનો તૂટી પડ્યા છે. ૧૦૦,૦૦૦ થી વધુ ઘરો અને વ્યવસાયોનો વીજળીનો પુરવઠો ખોરવાયો છે. શનિવારે બપોર સુધીમાં ન્યુ જર્સી, કનેક્ટિકટ, ન્યુ યોર્ક અને પેન્સિલવેનિયામાં ૮૮,૦૦૦ થી વધુ ગ્રાહકો વીજળી વગર રહ્યા હતા.

અમેરિકાના આ પૂર્વ કિનારે અગાઉ પણ આવા શક્તિશાળી વાવાઝોડાઓ ત્રાટકી ચૂક્યા છે, જેણે વ્યાપક આર્થિક નુકસાન પહોંચાડ્યું હતું. વર્તમાન સ્થિતિને ધ્યાનમાં રાખીને તંત્ર દ્વારા યુદ્ધના ધોરણે રાહત અને બચાવ કામગીરી હાથ ધરવામાં આવી રહી છે, તેમજ આગામી દિવસોમાં ક્ષતિગ્રસ્ત વીજળી અને માળખાકીય સુવિધાઓને પૂર્વવત કરવા માટે ખાસ પગલાં લેવામાં આવશે.